BRITANI- Plani i diskutueshëm i Mbretërisë së Bashkuar për të dërguar azilkërkues në Ruandë do të kushtojë 169,000 £ (210,000 dollarë) për person, megjithëse qeveria këmbënguli se do të kompensonte pjesën më të madhe të kostove.

Qeveria konservatore e Mbretërisë së Bashkuar e ka bërë një prioritet trajtimin e imigracionit dhe ishte një premtim kyç pasi vendi u largua nga Bashkimi Evropian.

Ajo dëshiron të nxjerrë jashtë ligjit kërkesat për azil nga të gjithë të ardhurit e parregullt dhe t’i transferojë ato në vende të treta "të sigurta", si Ruanda, për të ndaluar mijëra emigrantë të kalojnë Kanalin me varka të vogla.

Londra gjithashtu shpreson se programi do të veprojë si një pengesë. Qeveria ka vënë në pah koston e strehimit të azilkërkuesve ndërkohë që kërkesat e tyre janë duke u përpunuar, teksa përpiqet të fitojë mbështetje për projektligjin në Parlament, shkruajnë mediat e huaja.

Vlerësimi i ministrisë së brendshme tregon se kostoja fillestare e dërgimit të një individi në një vend të tretë do të jetë rreth 169,000 £ – duke përfshirë një pagesë prej 105,000 £ në vendin e tretë, së bashku me biletat e fluturimit dhe kostot e administrimit.