Çfarë është duke ndodhur në Rusi? Ja çfarë duhet të dini deri tani:

-Rusia thotë se lideri i Wagner Group do të shkojë në Bjellorusi pasi marshimi i tij rebel sfidoi Putinin

-Grupi mercenar rus Wagner, i udhëhequr nga Yevgeny Prigozhin, ka pretenduar se ka pushtuar objektet ushtarake në qytetin e Rusisë, Rostov-on-Don.

-Presidenti rus, Vladimir Putin, e ka dënuar atë që e ka quajtur “tradhti”, pas deklaratave të fundit të Prigozhinit.

-Prigozhin ka bërë thirrje për rebelim kundër ushtrisë ruse – ndonëse e ka mohuar se po synon puç.

-Pa e përmendur emrin e Prigozhinit, Putin është zotuar për t’i ndëshkuar ata që janë mbrapa rebelimit. Ai e ka pranuar se situata në Rostov-on-Don – qytet ku janë stacionuar pjesëtarë të Wagnerit – është e vështirë.

-Presidenti rus, Vladimir Putin ka mbajtur të shtunën një fjalim televiziv, duke i konsideruar veprimet e grupit mercenar rus, Wagner si “tradhti të lartë” dhe “thikë pas shpine”. Ai ka bërë thirrje për unitet dhe ka thënë se autoritetet janë duke vepruar shpejt për ta pasur nën kontroll situatën.

-Mercenarët e Wagnerit kanë thënë se kanë marrë kontrollin e qytetit rus Rostov-on-Don, pikë kyçe e ushtrisë ruse.

-Prigozhin ka thënë se do të marshojë në Moskë, nëse krerët më të lartë ushtarakë nuk takohen me të. Përmes një audio-mesazhi, ai duket se i është kundërpërgjigjur Putinit, duke thënë se trupat e tij nuk po kryejnë tradhti, por janë “patriotë” që po luftojnë për të ardhmen e tokës amë.

-Edhe komuniteti ndërkombëtar ka nisur të reagojë për këto zhvillime. Disa shtete në kufi me Rusinë janë duke e rritur sigurinë, derisa NATO-ja ka thënë se është duke e vëzhguar situatën në vazhdimësi.

-Në orët e vona të së premtes, Rusia ka rritur sigurinë në të gjitha aspektet: ka kufizuar internetin dhe tanket ushtarake janë parë nëpër rrugët e Moskës.

-Prigozhin e ka akuzuar ushtrinë ruse se ka nisur sulme vdekjeprurëse ndaj forcave të tij në Ukrainë – ku trupat e Wagnerit luftojnë përkrah ushtrisë ruse. Moska ka hedhur poshtë diçka të tillë.

Ndiqni më poshtë informacion të detajuar dhe përditësim direkt

MOSKË, 24 QERSHOR 2023 –

Përditësim drejtpërdrejt ndërsa më poshtë, gjithçka duhet të dini për të kuptuar më mirë çfarë po ndodh:

22:40

Situata me rebelimim nuk do të ndikojë në operacionin special ushtarak, tha Kremlini

Situata me kryengritjen e armatosur nuk do të ndikojë në asnjë mënyrë në rrjedhën e operacionit special ushtarak, ajo do të vazhdojë, u tha gazetarëve zëdhënësi i Kremlinit Dmitry Peskov, raporton noa.al. 

"Në asnjë mënyrë. Operacioni special ushtarak vazhdon, luftëtarët tanë në vijën e frontit shfaqin heroizëm, ata po shmangin kundërsulmin e forcave të armatosura të Ukrainës në mënyrë jashtëzakonisht efektive. Dhe operacioni do të vazhdojë," tha ai, duke iu përgjigjur një pyetjeje për këtë çështje.

22:36

Rusia thotë se lideri i Wagner Group do të shkojë në Bjellorusi pasi marshimi i tij rebel sfidoi Putinin

Kreu i kompanisë private ushtarake ruse Wagner do të transferohet në Bjellorusinë fqinje si pjesë e marrëveshjes për të zbutur tensionet e rebelimit dhe çështja penale kundër tij do të mbyllet, tha Kremlini të shtunën.

Trupat e Yevgeny Prigozhin që u bashkuan me të në kryengritje nuk do të përballen me ndjekjen penale dhe atyre që nuk e bënë do t’u ofrohen kontrata nga Ministria e Mbrojtjes, tha zëdhënësi i Kremlinit Dmitry Peskov.

Pas arritjes së marrëveshjes, Prigozhin tha se ai po urdhëronte trupat e tij të ndalonin marshimin e tyre në Moskë dhe të tërhiqeshin në kampet fushore në Ukrainë, ku ata më parë kishin luftuar përkrah trupave ruse.

Marrëveshja u duk se zbuti një krizë të përshkallëzuar në mënyrë dramatike që përfaqësonte sfidën më të rëndësishme për presidentin Vladimir Putin në më shumë se dy dekadat e tij në pushtet.

Marrëveshja u ndërmjetësua nga presidenti bjellorus Alexander Lukashenko, një aleat i vendosur i Putinit.

22:00

Tërhiqen mercenarët rusë

Udhëheqësi mercenar i Wagner, Yevgeny Prigozhin ka rënë dakord të ndalojë lëvizjen e trupave të tij që po përparonin në kryeqytetin rus.

Kjo vjen pasi presidenti i Bjellorusisë dhe aleati kryesor i Putinit, Alexander Lukashenko tha se Yevgeny Prigozhin ka pranuar propozimin e tij për të ndaluar avancimin e Grupit Wagner drejt Moskës, pasi ai kishte folur gjatë gjithë ditës me Prigozhin.

"Ne po i kthejmë kolonat tona dhe do të largohemi në drejtim të kundërt me kampet fushore sipas planit," tha Prigozhin në Telegram.

Zhvillimi i befasishëm i raportuar vjen pas një dite kaosi të plotë në Moskë, teksa qyteti po përgatitej për luftë duke rrëzuar dyert e vendstrehimeve, ndërsa ushtarët po ndërtonin postblloqe dhe automjetet ushtarake përmbytën rrugët.

Shefi i Wagner, Yevgeny Prigozhin thuhet se ka në dispozicion gjithsej 25,000 burra dhe 5,000 të tjerë ishin në Rostov-on-Don, qyteti jugor kyç i luftës së Rusisë në Ukrainë, të cilin Prigozhin tha se kishte marrë nën kontroll.

18:30

Sipas raporteve të mediave ndërkombëtare, forcat mercenare të Grupit Wagner po përparojnë drejt Moskës, duke marrë kontrollin e një qyteti rus dhe duke fituar terren në një tjetër ndërsa janë 200 km larg kryeqytetit rus.

18:00

Putin kërcënon mercenarët

Presidenti rus Vladimir Putin tha në një fjalim televiziv të shtunën se ngjarjet e fundit janë një tradhti ndaj vendit dhe popullit të tij dhe se Rusia do të mbrohet nga tradhtia e brendshme.

"Ne do të mbrojmë popullin tonë dhe shtetësinë tonë nga çdo kërcënim, përfshirë tradhtinë e brendshme. Ajo me të cilën jemi duke u përballur mund të quhet saktësisht tradhti.

Ambiciet e pakufizuara dhe interesat personale kanë çuar në një tradhti dhe një tradhti ndaj vendit dhe popullit të tij”, tha kreu i shtetit.

Sipas Putin, kjo ka çuar në tradhtinë "e kauzës për të cilën luftëtarët dhe komandantët e grupit Wagner kishin luftuar dhe humbën jetën krah për krah me formacionet dhe njësitë e tjera".

"Heronjtë që çliruan Soledar dhe Artyomovsk, qytete dhe vendbanime në Donbass, të cilët luftuan dhe humbën jetën për Novorossiya, për unitetin e botës ruse – emri dhe lavdia e tyre janë tradhtuar nga ata që përpiqen të organizojnë një kryengritje duke e shtyrë vendin drejt anarkisë dhe vëllavrasjes, humbjes dhe më në fund dorëzimit”, tha kreu i shtetit.

Një luftë civile nuk do të lejohet të përsëritet në vend, theksoi Putin.

Kanali Telegram i themeluesit të kompanisë private ushtarake Wagner, Yevgeny Prigozhin, më herët postoi disa regjistrime audio me akuza kundër udhëheqësve ushtarakë të vendit.

Pas kësaj, Shërbimi Federal i Sigurisë (FSB) i Rusisë ka hapur një çështje penale për një thirrje për një kryengritje të armatosur.

FSB-ja u bëri thirrje luftëtarëve të Wagner-it të mos i binden urdhrave të Prigozhin dhe të marrin masa për ndalimin e tij.

17:44

Igor Artamonov, guvernatori i rajonit rus të Lipetsk në jug të Moskës, konfirmoi se një kolonë ushtarake me njerëz dhe materiale të Grupit Wagner ndodhet në lëvizje përmes fshatit Krasnoye, rreth 250 milje nga kryeqyteti rus.

17:34

Avioni presidencial i Vladimir Putin u largua nga Moska të shtunën, duke ndezur zëra se ai është larguar nga kryeqyteti rus ndërsa forcat mercenare të Grupit Wagner përparojnë drejt kryeqytetit.

Avioni i presidentit u pa në radarin e fluturimit duke fluturuar në veriperëndim nga Moska në zonën e Shën Petersburgut – por më pas u zhduk nga sistemi pranë qytetit të Tverit, raportoi BBC. Në Tver, Putin zotëron një vendstrehim të madh rural.

Ushtria ruse raportohet të ketë sulmuar Wagnerin

Ushtria ruse është raportuar të ketë qëlluar ndaj pjesëtarëve të Wagnerit që po avancojnë drejt Moskës, pasi kanë hyrë në orët e para të së shtunës në qytetin jugperëndimor rus, Rostov-on-Don.

Një korrespodent i agjencisë së lajmeve Reuters, ka raportuar se ka qenë dëshmitar kur helikopterët ushtarakë rusë kanë hapur zjarr në një kolonë të Wagnerit, disa orë pasi shefi i grupit, Yevgeny Prigozhin ka thënë se forcat e tij i kanë pushtuar zonat ushtarake në Rostov-on-Don.

Kolona e Wagnerit besohet se është sulmuar pasi e ka kaluar qytetin Voronezh, që gjendet rreth 600 kilometra në veri të Rostov-on-Donit.

Sipas Reutersit, në kolonë ka pasur transportuese ushtarësh dhe të paktën një tanke.

Zelensky: Dobësia e Rusisë është e qartë

Presidenti ukrainas, Volodymyr Zelensky, ka thënë se secili që zgjedh “rrugën e djallit, e shkatërron vetveten”, dhe se “dobësia e Rusisë është e qartë”.

Ndonëse nuk e ka përmendur presidentin rus, Vladimir Putin me emër, Zelensky duket se e ka kritikuar liderin rus për dërgimin e “qindra mijëra njerëzve” në luftë.

Sa më gjatë që Rusia i mban trupat dhe mercenarët në Ukrainë “aq më shumë kaos, dhimbje dhe probleme do të ketë brenda vetes”, ka thënë Zelensky.

Prigozhin: Wagneri e mori qytetin pa asnjë të shtënë me armë

Prej mëngjesit të sotëm, mercenarët e grupit rus Wagner pretendojnë se e kontrollojnë qytetin rus Rostov-on-Don, që gjendet në jug të shtetit.

Në një audio-mesazh të publikuar në faqen e Wagnerit në Telegram, udhëheqësi i grupit, Yevgeny Prigozhin, siguron se trupat e tij kanë marrë kontrollin e qytetit “pa asnjë të shtënë të nisur nga ne”.

Ai thotë, po ashtu, se banorët e Rostov-on-Donit i kanë mbështetur pjesëtarët e Wagnerit, për shkak të “marshit të drejtësisë”.

Kush është Yevgeny Prigozhin?

Yevgeny Prigozhin, ish i burgosur dhe udhëheqës i një rrjeti të restoranteve, e ka rritur kompaninë private mercenare Wagner dhe është bërë figurë kyçe në Rusi – pas nisjes së luftës në Ukrainë – por edhe kritik i palodhshëm i komandës ushtarake ruse.

Ai tani ka nisur rebelim të hapur ushtarak kundër shtetit rus.

Prigozhin ka lindur më 1961 në atë që atëherë është quajtur Leningrad.

Si adoleshent ai është zënë dhe dënuar për vjedhje – një prej plot krimeve më serioze që ka kryer më vonë, përfshirë vjedhje të armatosur dhe trafikim të fëmijëve, për çka është dënuar me mbi nëntë vjet burgim.

Çfarë rëndësie kanë qytetet që Wagneri thotë se po i kontrollon?

Grupi mercenar rus Wagner pretendon se i kontrollon të gjitha objektet ushtarake në qytetin jugor Rostov-on-Don, dhe ka raportime se i kontrollon edhe zonat ushtarake në Voronezh – qytet më në veri të Rusisë.

Rostov ka qenë tejet i rëndësishëm prej nisjes së luftës së Rusisë në Ukrainë, në shkurt të vitit 2022.

Ai gjendet në kufi me Ukrainën, andaj ka shërbyer si baza kryesore për komandën jugore të ushtrisë së Rusisë. Ky qytet ka rreth një milion banorë, informin radio Free Europe.

Trupat ruse shpesh stacionohen aty, para se të dërgohen në Ukrainë.

Voronezh – një tjetër qytet rus jo shumë larg kufirit ukrainas – e ka gati madhësinë e njëjtë sa Rostovi.

Ky qytet gjendet në mes të Rostovit dhe kryeqytetit Moskës, dhe njihet si qendër kryesore hekurudhore.