Një javë pasi fitoi Ligën e tretë të Kampionëve në karrierë dhe ‘Tripletën’ sezonale me Manchester City, trajneri Pep Guardiola ka zbarkuar në Itali për një darkë surprizë me ish-bashkëlojtarët e tij te Brescia.

Katalanasi ka folur gjithmonë me superlativa për eksperiencën e tij si futbollist me skuadrën italiane. Edhe fotot e grupit nga mbrëmja festive e bëjnë më të qartë se si lidhja mes lojtarëve të asaj skuadre të trajnuar nga Carlo Mazzone është ende shumë e fortë.

Askush nuk e dinte për këtë ngjarje, por trajneri i ‘qytetarëve’, pasi kaloi natën në qytetin e Lombardisë, u largua përsëri të dielën, sepse do të ishte kumbari i edicionit të pestë të "Puma Legends Trophy", që po zhvillohet në ‘Empordà Golf Club’ nga dita e djeshme.

Pep festoi ‘tripletën’ e dytë në karrierë me këtë ndalesë të papritur në Itali. Në darkën që u shtrua në ‘Lanzani Sussi’ ishin të pranishëm Calori, Dainelli, Giunti, Caracciolo, Castellazzi, Mangone, Esposito dhe Emanuele Filipini. Roberto Baggio mungonte, sepse këto ditë ndodhet në Argjentinë.

📸 Pep Guardiola in Brescia, reunited with his old teammates!

IG: @/dainored pic.twitter.com/nhjeB3JBzl

— Italian Football TV (@IFTVofficial) June 18, 2023

Guardiola luajti për Brescia nga shtatori 2001 deri në korrik 2002 dhe nga janari deri në korrik 2003. Një periudhë kohore që i mjaftoi atij për të hyrë në zemrat e tifozëve të Brescia dhe për të mbetur në zemrat e ish-bashkëlojtarëve të tij, të cilët e pritën me krahë hapur.

Në fund të mbrëmjes, Pep Guardiola u përshëndet me një tortë të veçantë, ku shfaqi një fotografi të tij duke ngritur trofeun e Champions League në Stamboll.