Massimo Moratti, ish-presidenti i Interit, kujton Silvio Berlusconin në ditën e vdekjes së tij. Por i rikthehet edhe humbjes në finalen e Champions League dhe më gjerë. Ja deklaratat e tij për "Radio Giornale": “Silvio Berlusconi ka përfaqësuar të gjithë Italinë, një prani e fortë që ka ndikuar në jetën tonë. Pavarësisht nëse dikush ishte plotësisht dakord me të, ai krijoi ndryshime në jetë, politikë dhe futboll. Ishte një person me prani të fortë".

A ju frymëzoi të bëni më shumë dhe më mirë?

Ndoshta ai me të vërtetë më nxiti ta marr Interin. E pyeta se sa humbte çdo vit, më tha një shifër astronomike, e cila ishte e vërtetë. Doja ta sfidoja, të përballesha me Milanin e tij që fitoi gjithçka. Ishte një nga arsyet pse mora drejtimin e Interit.

Ku ndryshonte Berlusconi nga ju?

Ai ishte shumë i ngarkuar, unë punoja në grup. Atij i pëlqenin edhe taktikat e lojës, mua jo. Nuk shqetësohesha fare nga ai këndvështrim. Ishim pak më ndryshe, me të njëjtën dëshirë për t’i bërë njerëzit të lumtur. Kjo ishte gjëja kryesore.

Kur jeni takuar për herë të parë?

Ai erdhi për të na vizituar në zyrë, babai im ishte ende atje, kërkoi informacion për Sardenjën. Një herë më ftoi në shtëpinë e tij për arsye politike, që të përpiqemi të bëjmë diçka së bashku. Ai ishte jashtëzakonisht i sjellshëm, gjithmonë interesante ta takoje, shumë i gjallë. Gjithashtu kemi diskutuar çështje për të cilat nuk ishim plotësisht dakord. Kemi folur gjithmonë me respekt të ndërsjellë.

Nëna e Berlusconit ka punuar për babanë e Morattit…

Është e vërtetë, është e vërtetë…

Thuhet se Berlusconi ishte tifoz i Interit dhe se duhej ta kishte marrë Interin para Milanit…

Nuk e di për këtë, u tha fillimisht se ishte një tifoz i Interit për dashurinë e nënës së tij. Megjithatë, babai i tij ishte një mbështetës i Milanit. Gjithçka mund të thuhet… Mami i kishte punuar me babin tim, ajo ka qenë një sekretare e rëndësishme. Berlusconi ma kujtoi atë, ishte bukur ta kujtonim bashkë.

Nuk është më futbolli i Morattit dhe Berlusconit, thonë gjithmonë…

Një ndryshim që pritej të vinte për shkak të kostove që ka futbolli. Ekipet si Interi, Milani, Juve tani iu përkasin fondeve apo emirëve, jo më familjeve. Edhe këta njerëz kanë pasion, pas disa kohësh. Është sigurisht një mjedis shumë ekonomik, dhe me të drejtë. E kishim parë më pak nga ky këndvështrim.

Hera e fundit që jeni takuar?

Jo kohët e fundit, morëm pjesë në një ceremoni çmimesh së bashku më 2017, mesa më kujtohet. Ai çmim na solli fat për vitet në vijim.

A keni parë ndonjëherë ndeshje pranë Berlusconit? Dhe negociatat e merkatos direkt me të?

Ne kurrë nuk jemi përballur në merkato. Një herë me Gallianin, ai mendoi se donim të merrnim një lojtar, por unë i thashë që nuk ishim të interesuar. Nuk jemi përplasur kurrë me Berlusconin për të njëjtin lojtar. I kemi parë bashkë ndeshjet me Milanin, para se të bëhesha president. Në periudhën e tre holandezëve ai kënaqej shumë, i pëlqente. Gëzimi i tij ishte i dukshëm.

Dallimet midis finales së Stambollit dhe Champions League 2010?

Ka shumë dallime. Pjesa e parë m’u duk e keqe nga pikëpamja futbollistike. Në pjesën e dytë, loja ishte më serioze. Prisja që Manchester City të ishte më i fortë, Interi bëri një lojë serioze me taktika të mira nga Inzaghi. Mund ta kishim marrë trofeun në shtëpi ashtu si shkoi loja, por ishim shumë të pafat.

A ju ka surprizuar Inzaghi? Mendoj se do ta kishit shkarkuar atë…

Kjo është e saktë, sigurisht që do ta kisha bërë këtë dhe do të kisha gabuar, siç kam bërë disa herë në të kaluarën. Simone tregoi se ka karakter, më pas arriti aty ku duhej. Fitimi i Champions League do të ishte një gjë e jashtëzakonshme, por edhe ta mbyllësh i dyti është fantastike.

A do ta linit skuadrën kështu si sot apo do ta ndryshonit?

Nuk e di se si janë kontratat. Lukaku nuk është tërësisht i yni, duhet ta kuptojmë. Struktura e ekipit duhet mbajtur. Interi i tripletës me mua nuk ishte i vjetër si ekip, duhej mbajtur. Të njëjtën gjë do të bëja tani. Nëse Lukaku do të largohet, do ta përforcoja sulmin. Mesfusha është e fortë, mbrojtja më e fortë nga sa mendonim. Portieri është i fortë dhe përfaqëson të ardhmen. Drejtuesit duhet të fokusohen te sulmi.

A duhen lojtarë si Onana për karizmën e tyre?

Shpresoj që ai të qëndrojë. Një lojtar me një personalitet shumë të fortë dhe me guxim të madh, ai është shembull për të gjithë. Për mua nuk duhet humbur, ashtu si Barella. Ata janë lojtarë referues për të ardhmen.