Edhe Skënder Gega, kur e riktheu titullin kampion te Partizani mbas më shumë se dy dekadash “agjërim”, u largua nga drejtuesit e klubit të kuq. Mëkat, sepse një trajner kampion duhet të “blindohet”, jo të flaket.

Duket se kjo është një “sëmundje” e drejtuesve të “demave”, sepse të njëjtën gjë kanë bërë së fundi edhe me Giovanni Colella, trajnerin italian që i shpalli kampionë në kampionatin e fundit. Edhe pse flitet për gjasme dorëheqje të italianit, në fakt ai u detyrua të shkonte në këtë pikë.

Si fillim i larguan krahun e tij të djathtë, drejtorin sportiv Elton Marini, pastaj nisën kontakte me trajnerë të tjerë. Derisa dje, klubi i kuq njoftoi përmes kanaleve të tij zyrtare largimin e Colella:

“Partizani njofton mbylljen e bashkëpunimit me trajnerin Giovanni Colella, i cili i ka prezantuar dorëheqjen e parevokueshme presidentit Demi. Trajneri largohet nga Partizani pas një viti të suksesshëm, ku arriti së bashku me skuadrën objektivin madhor, titullin KAMPION…

E falënderojmë për kontributin “mister” Colella, që largohet nga Shqipëria si trajneri KAMPION, dhe i bëjmë me dije se dera e Partizanit do të mbetet e hapur për bashkëpunime të tjera në të ardhmen. GRAZIE MISTER! Ti mbetesh njëri prej nesh… P.M.T.P”

Ndërkohë, burimet pranë klubit të Partizanit bëjnë me dije se Zoran Zekic do të jetë pasardhësi i Colella. 49-vjeçari kroat ka parakaluar në momentet e fundit Tomislav Stipic, duke fituar kështu besimin e drejtuesve të kuq, teksa është bërë zgjedhje e parë për stolin e “demave”.

Zekic vlen të theksohet se në të kaluarën ka drejtuar Maksimir, Sheriff Tiraspol, Osijek, Diosgiori dhe Slaven Belupo. Vlen të theksohet se kroati 49-vjeçar e ka mposhtur Partizanin në përballjen që ka pasur kur drejtonte Sheriff Tiraspol.

Në dy duelet e vlefshme për eliminatoret e Ligës së Europës, që Partizani u përball me Sheriff e Zekic, në Moldavi, skuadra shqiptare barazoi me rezultatin 1-1 (1 gusht 2019), teksa goli u shënua nga Jasir Asani, ndërsa në duelin e parë humbi 1-0 në “Selman Stërmasi” (25 korrik 2019).