SHBA- Një adoleshent i Virxhinias Perëndimore shpërtheu në lot në gjykatë pasi u dënua me dy burgime të rënda për vrasjen e nënës dhe motrës, kur ishte vetëm 13 vjeç.

Connor Crowe, 16 vjeç, mori një dënim 80 vjet me burg, pasi u deklarua fajtor për dy akuza për vrasje të shkallës së dytë, për vrasjet e shtatorit 2020.

Pasi vrau motrën e tij, 15 vjeç, dhe nënën Melissa Rowland, 39 vjeç, Crowe u përpoq të pretendonte se një grabitës hyri në shtëpinë e tij dhe kreu vrasjet, përpara se ai më vonë të deklarohej fajtor për vrasjet në nëntor 2022.

Vrasjet i hutuan forcat e rendit ndërsa ende vazhdojnë të kërkojnë për një motiv. Prokurori Steven Dragisich pranoi: "Unë nuk mendoj se do ta kuptojmë vërtet pse ai e kreu këtë krim."

Krimet e Crowe tronditën qytetin e vogël të New Cumberland, një qytet i vogël jashtë Pittsburgh, Pensilvani. Sipas Weirton Daily Times, Crowe vrau nënën dhe motrën e tij duke qëlluar me disa plumba në secilin prej tyre, duke i vrarë ato menjëherë.

Më pas, 13-vjeçari doli nga shtëpia e tij dhe bërtiti për ndihmë nga lagja e tij, duke pretenduar se një i huaj hyri në shtëpinë e tij dhe vrau familjen e tij. Thuhet se Crowe i tha një fqinji se kishte arritur të qëllonte ndaj sulmuesit gjatë trazirave dhe e kishte goditur atë në shpatull.

Por arma e gjetur tregoi të kundërtën, ndërsa mjekësia ligjore zbuloi se adoleshenti kishte mbetje nga qitja e armës. Policia pohoi gjithashtu se nuk kishte prova të hyrjes me forcë në shtëpinë e tij.

Pas pranimit të fajit nga adoleshenti, prokurori Dragisich i tha gjyqtarit të qarkut Jason Cuomo: ‘Unë e di se ai ishte 13 vjeç, por detyra ime si prokuror i këtij qarku është të mbroj publikun. Pra, ne do të kërkojmë dënimin maksimal të lejuar me ligj, 40 vjet burg për çdo vepër, që do të ishte gjithsej 80 vjet.