Presidenti kinez Xi Jinping bëri thirrje të martën për përshpejtimin e përpjekjeve për modernizimin e sistemit dhe kapacitetit të sigurisë kombëtare.

Kreu i shtetit kinez bëri thirrje për të qëndruar të vetëdijshëm për rrethanat e komplikuara e të vështira me të cilat përballet siguria kombëtare dhe për të kuptuar saktë çështjet madhore të sigurisë kombëtare.

Ai kërkoi të bëhen përpjekje për të mbrojtur modelin e ri të zhvillimit të Kinës me arkitekturën e re të sigurisë, si edhe për të pasur arritje të reja në punën e sigurisë kombëtare.

Çështjet e sigurisë kombëtare përballë Kinës sot janë "ndjeshëm më komplekse dhe shumë më të vështira për t’u zgjidhur," u tha në mbledhjen e komisionit të sigurisë kombëtare ku Presidenti Xi është kryetar, duke u theksuar nevoja e përgatitjes për të trajtuar skenarët më të këqinj e më ekstremë dhe për të qenë të gatshëm për të përballuar "erërat e forta, ujërat e trazuara dhe stuhitë të rrezikshme".

Mbledhja bëri thirrje për ndërmarrjen e nismës për formimin e një mjedisi të jashtme të favorshëm sigurie për Kinën, për të mbrojtur më mirë hapjen e saj dhe për të forcuar një integrim të thellë të zhvillimit dhe sigurisë.

Në mbledhje u vu theksi edhe te reformimi i qëndrimeve të ndjekura në mbrojtjen dhe konsolidimin e sigurisë kombëtare, si edhe u kërkua përkushtim për të mbrojtur sigurinë politike e për të përmirësuar qeverisjen e sigurisë së të dhënave të internetit dhe inteligjencës artificiale, duke përshpejtuar përpjekjet për të ngritur një sistem të mbikëqyrjes së rrezikut dhe paralajmërimit të hershëm.

Mbledhja miratoi edhe dy dokumente, përkatësisht mbi përshpejtimin e formimit të një sistemi mbikëqyrjeje të rrezikut dhe paralajmërimi të hershëm lidhur me sigurinë kombëtare dhe mbi forcimin e komunikimit publik lidhur me sigurinë kombëtare.