Izmir Smajlaj ka thyer heshtjen më në fund, pasi kaloi një makth të vërtetë në karrierë. Fatmirësisht, çështja ligjore sportive u zgjidh në favor të tij, kështu që kampioni shkodran i atletikës njofton se do t’i kthehet pistës dhe garave zyrtare me synimin për rekorde të reja:

“I drejti nuk mposhtet kurrë! I pafajshëm! Falë një beteje të gjatë ligjore me AIU, ‘Sport Resolution’ (Gjykata Sportive Botërore) me seli në Londër ka shpallur PAFAJËSINË time kundrejt aludimeve për mashtrim ndaj një gare ku isha pjesëmarrës.

Isha i bindur që gjyqtarët e huaj do të vlerësonin të vërtetën dhe do kuptonin që çdo gjë që ishte hetuar ishte e gabuar dhe pa fakte ndaj meje, andaj jam tejet i lumtur. Me anë të këtij postimi ju komunikoj edhe rikthimin tim në pistë.

Falemnderime e mirënjohje për ata që besuan tek unë që në fillim, për punën e përkryer të avokatëve mbrojtës Z. Ermir Beta dhe Znj. Romina Zano, përkthyeses zyrtare Znj. Etleva Pushi, si dhe familjes sime që duroi e përjetoi një stres të panevojshëm”.

Izmir Smajlaj është një atlet shqiptar i specializuar në kërcimin së gjati. Ai fitoi medaljen e artë në Kampionatin Evropian të Atletikës 2017 në Beograd, medalja e parë e artë për Shqipërinë në një garë të madhe atletike, duke vendosur një rekord të ri kombëtar dhe personal prej 8.08 metrash.

Më të mirat e tij personale në kërcim së gjati janë:

8.16 metra – jashtë (NWI, 2021) në Tiranë (rekord i ri kombëtar)

8.11 metra – jashtë (0.7 m/s erë, 2019) në Shkodër (rekord i ri kombëtar)

8.08 metra – në ambiente të mbyllura (2017)

Vendi i parë në garën e kërcimit së gjati, medalje e artë në Kampionatin Evropian të Atletikës në salla të mbyllura, Beograd.

7.93 metra – në ambiente të mbyllura (2018)

Vendi i parë në garën e kërcimit së gjati, medalje e artë në Kampionatin Ballkanik të sallave të mbyllura, Stamboll, Turqi

7.89 metra në natyrë (2018)

Vendi i parë në garën e kërcimit së gjati, medalja e artë dhe atleti olimpik më i mirë në Kampionatin Shqiptar të Atletikës në natyrë, Elbasan, Shqipëri.

7.89 metra në natyrë (2018)

Vendi i parë në garën e kërcimit së gjati, medalja e artë dhe titulli "Sportisti më i mirë mashkull i garës" në Shtetet e Vogla të Evropës, Kampionati i Shteteve të Vogla të Evropës (CSSE).

Në kërcim trehapësh, ai ka rezultatin më të mirë personal prej 16.30 metrash në natyrë (-0.2 m/s erë; 2016; Elbasan, Shqipëri) dhe 15.15 metra në ambiente të mbyllura (2014; Tiranë, Shqipëri).