Nuk ka "armëpushim" te Bayern Munich. Pas javësh, madje muajsh trazirash te kampioni gjerman, pas shkarkimit të Julian Nagelsmann, agresionit të Mane ndaj Sané dhe eliminimeve si në Kupën e Gjermanisë, ashtu edhe në Champions League, situata në kampin bavarez është shumë e nderë.

Megjithatë, "tërmeti" kryesor te Bayern Munich është ende duke ardhur. Këtë e siguron Jan Åge Fjørtoft, ish-lojtar i Frankfurtit dhe analist aktual për kanalin televiziv "Sky". Sipas norvegjezit, shefi ekzekutiv i klubit bavarez, Oliver Kahn, i ka ditët e numëruara në postin që mban, pas skandaleve të shumta që tronditën Bayern Munich në vitin 2023.

Ish-sulmuesi publikoi në llogarinë e tij në Twitter se kishte vënë re një "proces në vazhdim" dhe se po, "është vetëm çështje kohe deri sa ish-portieri të shkarkohet nga detyra". Diçka që mund ta kryejë vetëm këshilli mbikëqyrës, i kryesuar nga presidenti aktual i klubit Herbert Hainer dhe paraardhësi i tij Uli Hoeness.

Hainer ka komentuar për Dpa se gjithçka që rrethon Bayernin dhe çështjen e Kahn nuk është plotësisht e vërtetë: "Këto thashetheme nuk janë të vërteta". "Madje u fol edhe për një rikthim të Uli Hoeness në bord”, – ka shkruar Fjörtoft, i cili gjithashtu ka theksuar se ish-kapiteni Philipp Lahm, kreu i organizimit të "Euro 2024" në Gjermani, është favoriti kryesor në planin afatgjatë për të marrë pozicionin e Kahn si CEO i 6 herë kampionëve evropianë.

“Një trajner duhet të fitojë mbi dhomën e zhveshjes. Dhe një CEO duhet të fitojë mbi punonjësit. Mbizotëron ndjenja se Kahn nuk i ka fituar kompetencat dhe për rrjedhojë nuk ka mbështetjen e duhur”, – theksoi Fjørtoft.

Duhet mbajtur mend se Kahn iu bashkua bordit të drejtorëve të Bayernit në janar 2020 dhe, pas lamtumirës së ish-menaxherit të përgjithshëm Karl-Heinz Rummenigge në korrik 2021, ai u emërua CEO i ri i klubit, për të cilin luajti gjithsej 632 ndeshje si profesionist.

Sigurisht, duket se talenti i tij nuk është i njëjtë në katin e parë të një klubi që aktualisht është hija e atij që ishte me Hoeness dhe Rummenigge në komandë. Prandaj, 65 për qind e tifozëve të Bayernit, siç pasqyrohet në një sondazh të gazetës "TZ", të kryer në fillim të prillit, duan të kthehen te kupola e vjetër e klubit.