Durrës- Identifikohen të rinjtë e plagosur me armë pas sherrit në TikTok në Durrës si dhe emri i agresorit.

Ngjarja ndodhi në orët e para të mëngjesit, saktësisht rreth orës 01:15 minuta, në lagjen nr. 10.

Dyshohet se për shkak të një konflikti në rrjetin social TikTok, Klajdi Mansaku 25 vjeç, ka qëlluar me armë zjarri, dhe si pasojë, janë dëmtuar lehtë Jurgen Vrioni 21 vjeç, dhe Arben Haxhiu, 21 vjeç, të dy banues në lagjen nr. 12, Durrës.

Nga veprimet e para hetimore rezulton se autori i dyshuar, Klajdi Masaku, rreth orës 22.30, të mbrëmjes së djeshme ka debatuar në telefon me shtetasin Mario Vrioni, (kushuri i shtetasit Jurgen Vrioni) dhe i ka lënë takim për tu sqaruar në afërsi të banesës së Mario Vrioni.

Mario Vrioni, pasi ka marrë kushëririn e tij Jurgen Vrioni, dhe Arben Haxhiu, (shok i përbashkët i tyre) kanë shkuar në vendin ku e kishin lënë për tu sqaruar me Klajdi Mansaku

Ky i fundit sapo ka parë që këta shtetas janë afruar, ka qëlluar me armë zjarri në drejtim të makinës së shtetasit Mario Vrioni, dhe është larguar menjëherë.

Si pasojë, (dyshohet nga plumb rikoshet) janë lënduar lehtë Jurgen Vrioni, i cili pas ndihmës mjekësore ka dalë nga spitali, dhe Arben Haxhiu, që aktualisht po merr ndihmë mjekësore dhe është jashtë rrezikut për jetën.

Grupi hetimor në bashkëpunim me Prokurorinë po vijon punën për dokumentimin e plotë të rrethanave të ngjarjes.

Ndërkohë nga shërbimet e Policisë janë ngritur pika kontrolli, në akset rrugore, janë njoftuar pikat e kalimit kufitar, dhe po ushtrohen kontrolle në banesa e ambiente ku dyshohet se mund te fshihet 25 vjeçari me qëllim kapjen e tij.