Mbrojtja e vendit të tretë në Serie A dhe arritja sa më mirë në ndeshjen e parë çerekfinale të Ligës së Kampionëve kundër Napolit është misioni i këtij muaji për kuqezinjtë. Nesër kundër Empolit në “San Siro”, trajneri Stefano Pioli kërkon konfirmimin pas fitores së bujshme 4-0 ndaj Napolit kryesues, që vetëm po pret t’ia rrëmbejë zyrtarisht kurorën e kampionit të Italisë.

Këto janë ditë vendimtare për Milanin e tij, ndaj nuk lejohen shpërqendrime. Duke folur në konferencën për shtyp, trajneri i “Djallit” iu përgjigj pyetjeve të gazetarëve.

Cili është niveli i tensionit të ekipit?

Është thelbësore të qëndrojmë në tension; ndeshjet fitohen së pari me qëndrime, vendosmëri dhe më pas me cilësi. Duhet të jemi të përulur; kampionati është i rëndësishëm për ne, ndaj duhet të përfitojmë nga kjo javë në shtëpi.

Si po i përjetoni lajmet për Berlusconi?

Të gjithë jemi të shqetësuar, por nuk e kemi të qartë situatën e tij shëndetësore. Nuk kemi ende një lajm kaq të saktë.

Si e prisni sfidën e ditës së nesërme?

Ne duhet të qëndrojmë në rrugën e duhur. Morëm një fitore të rëndësishme në Napoli, por duhet ta përdorim atë për të luajtur në atë nivel si atje gjatë gjithë kohës. Duhet të mendojmë vetëm për nesër.

A do të luani nesër me formacionin më të mirë?

Formacioni do të jetë më i miri i mundshëm, sipas ideve të mia. Më pas do të luajmë shumë ndeshje, kështu që me siguri do të ketë disa ndryshime.

Leao tha se në të majtë është pozicioni i tij i preferuar…

Unë nuk jam i kënaqur vetëm me një lojtar. Rafa më kishte thënë pikërisht të kundërtën, por është e rëndësishme që ai të jetë i lumtur dhe të luajë me buzëqeshje. Ai nuk duhet të jetë i shqetësuar, ka kaluar një kohë të vështirë si gjithë ekipi.

A ka ndonjë problem racizmi në futbollin italian?

Nuk e di. Kam shumë miq që shkojnë në stadium me respekt, por më vjen shumë keq, sepse futbolli dhe sporti duhet jetuar me një frymë tjetër.

A do të jetë gati për nesër Brahim?

Ai bëri dy seanca stërvitore larg njëra-tjetrës, por është i disponueshëm dhe pastaj do të bëj zgjedhjet e mia.

A keni probleme me skuadrat më të mbyllura?

Vëmendje dhe cilësi e lojës, kjo është e nevojshme ndaj cilitdo kundërshtari. Më pas, me ekipe më të mbyllura kemi pasur vështirësi, por kemi punuar dhe pres përmirësime.

Spalletti tha se Milani fitoi ngaqë ju kishit frikë të humbisnit…

Nuk kam pse të komentoj fjalët e Spallettit, do të ishte gabim të mendoja për Napolin tani.

A keni shumë keqardhje që nuk do ta mbroni dot kurorën e titullit?

Gjykimet bëhen në fund, në fund të kampionatit, shpresoj të ecim më tej në Champions League. Duhet të bëjmë më të mirën në këto dy muaj.