Është Antonio Conte, sërish plot energji, por duket si Steve Kerr, trajneri i kampionëve në fuqi të NBA-së, Golden State Warriors. “Premier League po bëhet si NBA, kështu që duhet të jesh i përgatitur për çdo gjë, përndryshe përfundon pa trofe dhe mbeteni pa Kupat e Evropës”, – tha italiani nga qendra stërvitore e Tottenhamit.

Ndërkohë ai shpjegoi se si po e përballon betejën për vendin e katërt në Premier League (zonën Champions): "Përfundimi në top 4 të Premier League është një rezultat i shkëlqyer për çdo klub. Renditja tregon se ka ekipe të rëndësishme pretendente, të cilat kanë fituar gjëra të mëdha në të kaluarën.

Dhe siç tha Guardiola, çdo ekip këtu është përmirësuar aq shumë sa mund të humbasësh pikë me këdo, madje edhe me të fundit në klasifikim. Gara për vendin e katërt do të jetë një sprint shumë i vështirë, sepse ka skuadra si Brighton, me lojtarë të rëndësishëm dhe në formë të shkëlqyer.

Dhe pastaj sigurisht Liverpool, Newcastle, Chelsea. Do të jetë një garë e fortë për të gjitha skuadrat e përfshira. E konsideroj rezultat të shkëlqyer nëse e përfundojmë kampionatin në vendin e katërt”.

Conte i rikthehet edhe temës së shkarkimit të tij të mundshëm, për të cilin foli pas eliminimit me Milanin: "Më kishin pyetur për të ardhmen time, u përgjigja se në futboll nuk dihet kurrë dhe kush e di, ndoshta klubi po mendonte të më shkarkonte.

Ishte një shaka, një koment sarkastik. Nuk mendoj se klubi e kishte menduar ndonjëherë këtë, sepse ata shohin çdo ditë se si punojmë unë dhe stafi im. Mendoj se ka një klub në botë që mund ta sigurojë trajnerin e tij se do të qëndrojë deri në fund të sezonit, sepse futbolli është i çuditshëm dhe nuk e dini kurrë se çfarë ndodh. Ne duhet të pranojmë ende të gjitha llojet e situatave, përfshirë thashethemet”.