Tiranë – Një grua e vrarë, 5 të plagosur dhe një fëmijë 10 vjeç i lënduar. Ky është bilanci i asaj që duket se ka qenë atentat mbrëmjen e sotme në një lokal në rrugën "Anastas Shundi", tek zona e njohur si "Don Bosko" në Tiranë.
Nga breshëria me armë mbeti e vrarë punonjësja e lokalit, Mimoza Paja 60-vjeçe dhe të plagosur Sahit Murati, Astrit Meraj, Emanuel Sala, Ermir Bejuku, Genc Shaholli.
Ai tha se i biri ka qenë duke pirë kafe në momentin që ka ndodhur ngjarja ndërsa tha se ka marrë dy plumba.
Më tej ai theksoi se i biri është jashtë rrezikut për jetën dhe ndodhet në gjendje të mirë shëndetësore.
Babai i Emanuelit, i tronditur nga kjo ngjarje u shpreh: “Kam djalin. Emanuelin. Është më mirë. Ka shpëtuar, është jashtë rrezikut për jetën. Po pinte kafe. Ishte në lokalin e lagjes,”- tha ai.
Krimi i rëndë ndodhi sonte rreth orës 21:05, në rrugën "Ananstas Shundi", në lokalin në pronësi të shtetasit F. M., raporton noa.al.
Në rrethana ende të paqarta, nga persona ende të paidentifikuar, është qëlluar me armë zjarri.
Si pasojë ka humbur jetën shtetasja Mimoza Paja, rreth 60 vjeçe, banakierja e lokalit.
Ndërkaq janë plagosur shtetasit Sahit Murati 50 vjeç, Astrit Mera 42 vjeç, Emanuel Sala 47 vjeç, Ermir Bejuku 45 vjeç dhe Genc Shaholli, 55 vjeç.
Gjithashtu është lënduar në dorë nga ciflat e xhamave, një e mitur 10-vjeçare.
Për hetimin e kësaj ngjarjeje është ngritur një grup i posaçëm hetimor dhe nën drejtimin e Prokurorisë vijon puna intensive për zbardhjen e rrethanave të ngjarjes, sekuestrimin e provave që do të shërbejnë për zbardhjen e ngjarjes, identifikimin dhe kapjen e autorëve.
Ndërkohë janë ngritur pika kontrolli në bashkëpunim me Drejtoritë Vendore të Policisë Durrës, Elbasan, Lezhë e Dibër.
Shërbimet e Policisë po vijojnë kontrollet në gjithë territorin ku dyshohet që mund të kenë lëvizur ose ku mund të fshihen autorët.
Kush është Fatjon Murati?
Fation Murati
Më 8 tetor 2022 Fatjon Murati u arrestua në makinë me Endrit Doklen dhe Gentjan Reçin për mbajtje pa leje dhe prodhimi i armëve, armëve shpërthyese dhe municionit”. Burimet bëjnë me dije se aktualisht ishte nën masën e sigurisë "arrest shtëpie".
Ndërkohë më 14 tetor 2022 Prokuroria e Tiranës i kërkoi Gjykatës së Tiranës sekuestro preventive mbi katër prona të paluajshtme dhe tri biznese me vlerë rreth 5 milionë euro në emër të tij, pasi sipas Prokurorisë dyshohen se kanë prejardhje kriminale.
Çfarë tha kreu i hetimeve, Shatro
Drejtori i hetimit të krimeve në Drejtorinë e Policisë së Tiranës, Alket Shatro, konfirmoi se lokali ku ndodhi atentati mbrëmjen e sotme, në rrugën "Ananstas Shundi", në Tiranë, është në pronësi të një personi me precedentë penalë.
Personi i identifikuar nga policia me incialet F.M rezulton të jetë, Fatjon Murati, pronari i lokalit i cili ishte arrestuar më 8 tetor 2022 nga policia e Tiranës për arsenal armësh. Burimet bëjnë me dije se ai ka qenë në "arrest shtëpie"
“Po është e vërtetë lokali është në pronësi të një personi me precedent penalë” tha Drejtori i hetimit të krimeve në Drejtorinë e Policisë së Tiranës, Alket Shatro gjatë një prononcimi për medien nga vendi ku ndodhi atentati.
“Është herët për të folur në lidhje me motivet” tha më tej ai duke sqaruar se “Të shtënat kanë qenë nga jashtë dhe se nuk ka pasur përplasje me armë.
Shatro sqaroi gjithashtu se nuk rezulton që të ketë pasur kundërpërgjigje me armë nga personat që kanë qenë brenda lokalit ndërsa nuk është plagosur personi që është pronar i lokalit.
Çfarë ndodhi në Tiranë
Në lidhje me ngjarjen e ndodhur mbrëmjen e djeshme në Don Bosko, hetimo nxori se më datë 12 mars 2023, rreth orës 21:05, në rrugën "Anastas Shundi", në drejtim të lokalit në pronësi të shtetasit Fation Murati është qëlluar me armë zjarri automatike dhe për pasojë ka mbetur e vrarë shtetasja Mimoza Paja, 58 vjeçe, e cila ishte e punësuar si banakiere, si dhe janë plagosur 5 shtetas, 3 prej të cilëve vazhdojnë të jenë në spitalin e Traumës duke marrë ndihmë mjeksore. Po ashtu u plagos dhe një vajzë 10 vjeçare.
Grupi i posaçëm hetimor, ka vazhduar kryerjen e veprimeve në vendin e ngjarjes, gjetjen dhe sekuestrimin e provave materiale, pyetjen e të dëmtuarve dhe dëshimtarëve okularë dhe sekuestrimin e pamjeve filmike.
Më datë 13 mars 2023, është rikqyrur vendi i ngjarjes, ku janë gjetur dhe sekuestruar edhe disa prova të tjera të vlefshme për hetimin.
Po sot më datë 13 mars 2023, në orët e para të mëngjesit, në vendin e qujatur “Ura e Sul Meres”, në territorin e fshatit Likmetaj, strukturat e Drejtorisë Vendore të Policisë Durrës, kanë konstatuar një automjet të djegur, brenda të cilit janë gjetur 3 armë zjarri automatike.
Grupi hetimor ka kqyrur automjetin e djegur dhe ka sekuestruar disa prova të vlefshme për hetimin. Nga verifikimi i numrit të shasisë së automjetit rezulton se ky mjet tip BMW, seria 5, (525) me ngjyrë gri, ishte vjedhur gjatë natës më datë 14.03.2021, në lagjen nr 13 Durrës.
Të gjitha provat metariale të sekuestruara në vendngjarje në rrugën “Anastas Shundi” dhe në fshatin Likmetaj, janë dërguar në Institutin e Policisë Shkencore ku po u nënshtrohen ekzaminimeve të mëtejshme.
Dinamika e kësaj ngjarjeje është si më poshtë:
Autorët janë afruar me automjetin tip BMW, me targa të huaja në rrugën “Anastas Shundi”, kanë ndaluar makinën përbri lokalit të shtetasit Fation Muratit, dhe dy nga autorët kanë zbritur nga makina duke hapur zjarr me breshëri në drejtim të lokalit. Pas kësaj autorët kanë hipur në automjet dhe janë larguar me shpejtësi në drejtim të spitalit ushtarak, kanë vazhduar në autostradën Tiranë – Durrës, kanë devijuar rrugën në mbikalimin e Vorës dhe kanë djegur automjetitn në fshatin Likmetaj.
Strukturat e Krimeve të Rënda në Drejtorinë Vendore të Policisë Tiranë, nën drejtimin e Prokurorisë së Rrethit Gjyqësor Tiranë dhe me mbështetjen e Departamentit të Policisë Kriminale në Drejtorinë e Përgjithshme të Policisë së Shtetit, janë duke analizuar informacionet për autorë të dyshuar dhe për motivet e kësaj ngjarjeje.
Pronari i lokalit shtetasi Fation Murati, është nën hetim nga Prokuroria e Rrethit Gjyqësor Tiranë për veprën penale “Mbajtja pa leje e armëve dhe municionit luftarak”, parashikuar nga neni 278 i Kodit Penal dhe po hetohej me masën e sigurimit “Arrest në shtëpi”.
Më datë 07.03.2023, shërbimet e Policisë së Komisariatit Nr. 3, në zbatim të procedurave standarde të punës, kanë kontrolluar dhe gjetur në banesë shtetasin F. M., ndërsa në kontrollin e datës 12.03.2023, gjatë kontrollit ky shtetas nuk është gjetur në banesë dhe është shpallur në kërkim dhe punohet për gjetjen dhe arrestimin e tij.
Policia e Shtetit njoftoi të hënën se fton qytetarët që të japin informacion për autorët e kësaj ngjarjeje dhe vendos shpërblim prej 20 mijë euro, për çdo informacion të vlefshëm që do çojë në identifkimin e autorëve. Policia e Shtetit vendos në dispozicion të publikut numrin e telefonit 069 41 11 546.