Termocentrali bërthamor i Zaporizhia ka humbur furnizimin me energji elektrike, pasi forcat ruse lëshuan një breshëri raketash në 7 rajone të Ukrainës.

Sipas raportimeve të fundit, si pasojë e këtyre sulmeve deri më tani kanë humbur jetën 5 persona dhe janë plagosur disa të tjerë.

Sipas zyrtarëve ukrainas, shënjestra e raketave ruse nuk ishin vetëm pikat strategjike, por edhe ndërtesat e banimit.

Zyrtarët vendas njoftuan se granatimet kanë shkëputur termocentralin bërthamor të Zaporizhzhia të Ukrainës nga rrjeti energjetik ukrainas.

“Sot është ndërprerë linja e fundit e komunikimit ndërmjet NPP-së së okupuar Zaporizhzhia dhe sistemit energjetik të Ukrainës. Karburanti për funksionim mbetet për 10 ditë”, thuhet në një deklaratë të kompanisë së energjisë Enerhoatom.

Në gusht të vitit të kaluar zjarret e shkaktuara nga granatimet prenë linjën e fundit të mbetur të energjisë në termocentralin bërthamor të Zaporizhia, duke e shkëputur përkohësisht atë nga Rrjeti Kombëtar i Ukrainës për herë të parë në gati 40 vjet funksionim. Më pas, u deshën dy javë që energjia t’i rikthehej uzinës.

Presidenti rus Vladimir Putin filloi pushtimin e tij pak më shumë se një vit më parë. Që atëherë, dhjetëra mijë luftëtarë dhe civilë janë vrarë ose plagosur dhe miliona ukrainas janë detyruar të lënë vendbanimet.