Tragjedia e ndodhur mesditën e sotme në Paskuqan vijon ende dhe policia kërkon ndihmë për kapjen e 40-vjeçarit Dan Hutra, por të tjera raporte vijnë për ngjarje dramatike.

Sipas raportimeve thuhet se 40-vjeçari që ende qarkullon i lirë, ka plagosur me thikë një grua në zonën e Astirit.

Policia tha se, rreth orës 12:15, është paraqitur për të marrë ndihmë mjekësore në spital, shtetasja M. G., 40 vjeçe, e dëmtuar me mjet prerës, e cila ndodhet jashtë rrezikut për jetën.

Dyshohet se kjo shtetase është dëmtuar me mjet prerës, në zonën e quajtur "Astiri”.

Po punohet për identifikimin dhe kapjen e autorit të dyshuar.

Zyrtarisht nuk jepen të dhëna nëse ngjarja është e lidhur me të njëjtin të dyshuar.

Disa minuta më herët, Dan Hutra akuzohet se vrau 2 gra në Paskuqan, familjarë të ish-gruas. Hutra doli nga burgu më 16 shkurt pasi vrau gruan në vitin 2007 në Kukës.

Më datë 01.03.2023, rreth orës 12:30, në rrugën "Rustem Haklaj", në Kodër-Kamzë, shtetasi Dan Hutra, rreth 40 vjeç, ka plagosur me armë zjarri shtetaset Elena Hysa, 35 vjeçe, dhe Kujtime Hysa, 60 vjeçe (ish-bashkëjetuesja e tij dhe nëna e saj) dhe ka vrarë me armë zjarri shtetaset, Mevlute Hysa 30 vjeçe, (motra e ish-bashkëjetueses së tij) dhe Hasime Dafku 30 vjeçe, (e fejuara e vëllait të ish-bashkëjetueses).

Autori i dyshuar është shpallur në kërkim dhe vijon puna për kapjen e tij. Do të ndajmë me publikun foton e autorit të dyshuar dhe mirëpresim çdo informacion për vendndodhjen e tij.

Autori i dyshuar është arrestuar për dhunë në familje në datën 16.06.2022, dhe është liruar me datë 16.02.2023. Më parë, ai ka qenë i dënuar për vrasjen e bashkëshortes së tij, ngjarje e ndodhur në vitin 2007, në Kukës”, thotë policia.