Transmetuar më 27-02-2023, 10:14

Fundjava që sapo lamë pas pa shumë nga futbollistët e kombëtares shqiptare që luajnë jashtë vendit (legjionarët kuqezinj) të zbrisnin në fushë e të jepnin kontributin e tyre me klubet ku aktivizohen. 4 prej futbollistëve shqiptarë që luajnë në Itali; Ardian Ismajli, Berat Gjimshiti, Elhan Kastrati dhe Nedim Bajrami luajtën minuta të plota me ekipet e tyre respektive. Pavarësisht autogolit të shënuar në sfidën ndaj Napolit, Ismajli vlerësohet si lojtari më i mirë në radhët e Empolit me notën 7.3, një vlerësim mjaft i mirë ky për mbrojtësin kuqezi.

Sakaq, edhe mesfushori Nedim Bajrami është vlerësuar me notë shumë të mirë nga uebsajti i specializuar për statistika "SofaScore", me notën 7, teksa u aktivizua nga minuta e parë në duelin ndaj Lecce. Nga ana tjetër, edhe Elhan Kastrati e Berat Gjimshiti bënë paraqitje të mira në radhët e skuadrave respektive.

Mbrojtësi kuqezi, Enea Mihaj është shndërruar në protagonist në Portugali, duke fituar vendin e titullarit. Djaloshi shqiptar është vlerësuar me notën 7.2 nga ‘Sofascore’, teksa javë pas jave po tregon cilësitë e tij mjaft të mira tek ekipi i Famalicaos.

Edhe Arbnor Mucolli është kthyer në titullar të padiskutueshëm në radhët e Vejles në Danimarkë, duke fituar kështu besimin e stafit të ekipit të tij. Ndërkaq, që nga minuta e parë e ndeshjeve kanë luajtur në radhët e skuadrave të tyre edhe Myrto Uzuni, Ernest Muçi, Ivan Balliu e Amir Abrashi.

Nga ana tjetër, talenti kuqezi, Anis Mehmeti po shndërrohet në një titullar absolut te skuadra e Bristol Sitit, duke u aktivizuar 3 ndeshje radhazi që nga minuta e parë.