Një nga të panjohurat e mëdha të Botërorit të ri për Klube me 32 skuadra, që do të nisë në vitin 2025, është mënyra se si UEFA do t’i shpërndajë 12 vendet e saj. Edhe pse bisedimet mes FIFA-s, UEFA-s dhe ECA-s janë ende duke u zhvilluar, "Times" tashmë po jep një të dhënë të parë që mund të përfundojë duke u kristalizuar.

Bëhet fjalë për dhënien e tetë vendeve sipas koeficientit të UEFA-s dhe katër të tjera për fituesit e Champions League të edicioneve të fundit para formatit të ri të Botërorit për Klube (2022, 2023, 2024 dhe 2025). Në këtë mënyrë, Real Madridi do ta kishte tashmë të siguruar pozicionin e tij në edicionin e parë që do të mbahet në qershor 2025.

Renditja e UEFA-s konsiderohet si shkalla më logjike dhe më e drejtë për të dhënë shumicën e vendeve. Aktualisht, dhe nëse Botërori i ri i Klubeve do të ishte i menjëhershëm, të tetë të klasifikuarit në këtë mënyrë do të ishin: Bayern Munich, Manchester City, Liverpool, Chelsea, PSG, Real Madrid, Barcelona dhe Manchester United.

Duke pasur parasysh se Real Madridi do të klasifikohej si fitues i Champions League, vendi i tyre do t’i shkonte Juventusit, i nënti në renditje. Sigurisht, “Times” shpjegon se UEFA dëshiron të kufizojë ekipet e klasifikuara sipas shteteve në dy. Kjo do të prekte veçanërisht anglezët, të cilët kanë katër në tetë të parat në renditje.

Përfituesit në koeficient do të ishin: Ajax dhe Dortmund. E vetmja mënyrë për të pasur katër klube për çdo vend është që dy prej tyre të fitojnë Ligën e Kampionëve në vitet e mëparshme dhe dy të tjera të jenë në tetë më të mirët në renditje.

FIFA raportoi së fundi se tashmë ka vendosur për shpërndarjen e vendeve sipas Konfederatave për Botërorin e ri të Klubeve. UEFA (Evropë) do të ketë 12 skuadra, CONMEBOL (Amerika e Jugut) 6, AFC (Azia) 4, CAF (Afrika) 4, Concacaf (Amerika Qendrore dhe Veriore) 4, OFC (Oqeania) 1 dhe një vend për organizatorin e turneut.

Botërori i ri për Klube, i zgjeruar në 32 ekipe, është basti i madh i Infantinos për mandatin e tij të ri, të cilin do ta inaugurojë brenda një muaji në Kongresin e Përgjithshëm të Ruandës. Deri në vitin 2025, FIFA do ta mbajë Botërorin për Klube me formatin e zakonshëm të viteve të fundit.