Avokati i Kathryn Mayorga është urdhëruar t’i paguajë Cristiano Ronaldos plot 334.637.50 dollarë për të rimbursuar tarifat ligjore që 38-vjeçari pagoi ndërsa mbrohej në një proces gjyqësor, pasi modelja amerikane e akuzoi atë për përdhunim.

Mayorga, e cila hoqi dorë nga e drejta për anonimitet, kishte pretenduar se Ronaldo e përdhunoi në vitin 2009 në një hotel të Las Vegas, por Ronaldo i mohoi akuzat. Dyshja arritën një marrëveshje në vitin 2010, megjithatë tetë vite më vonë ajo ngriti padi civile, pasi “Football Leaks” ekspozoi detaje të komunikimit midis avokatëve të Ronaldos.

Padia civile u hodh poshtë në qershor të vitit të kaluar, kur gjyqtarja e qarkut amerikan Jennifer Dorsey vendosi që avokati i Mayorga, Leslie Mark Stovall, ishte mbështetur në të dhënat e zbuluara dhe të vjedhura nga “Football Leaks”. Nga ana tjetër, avokati i Ronaldos, Peter Christiansen, kërkoi që Stovall të mbahej personalisht përgjegjës për 626.000 dollarë, tarifa e avokatit.

Dokumentet gjyqësore të depozituara më 14 shkurt të këtij viti tregojnë se gjyqtari e ka pranuar kërkesën dhe e ka shpërblyer atë me gjysmën e shifrës së lartpërmendur.

Gjyqtari Dorsey pranoi kur u rrëzua padia verën e kaluar se Ronaldo kishte vuajtur si rezultat i sjelljes së Stovall, por gjithashtu e konsideroi ish-lojtarin e Manchester United pjesërisht fajtor që nuk kërkoi ta skualifikonte më shpejt avokatin e Mayorga.

Në vendimin origjinal prej 42 faqesh të Dorsey, ajo shkroi se “edhe në fazën e hershme të procesit gjyqësor ishte e qartë se akuzat e Mayorga ishin të rrënjosura në materialin e fshehur”.

Gjykatësi Dorsey akuzoi gjithashtu z.Stovall për "abuzime dhe anashkalim flagrant të procesit të duhur gjyqësor" dhe se "Mayorga humbet mundësinë e saj për ta ndjekur këtë çështje" si rezultat i sjelljes së tij.