Emre Can, mesfushori aktualisht i Borussia Dortmund, ka dhënë një intervistë për "The Athletic", në të cilën ka rikthyer disa faza të karrierës së tij, duke u fokusuar veçanërisht në periudhën që jetoi me Jurgen Klopp si trajner te Liverpool.

“Kur kujtoj ato momente, them gjithmonë se më kujtohet sa vrapuam, – e nis rrëfimin Emre Can, duke iu referuar nevojave të trajnerit në stërvitje dhe në ndeshje. – Ne shkonim lart e poshtë gjatë gjithë ditës.

Në fillim cilësia nuk ishte shumë e lartë, por në dy sezonet e fundit kemi pasur një ekip vërtet të fortë, i cili gjithashtu e kupton rëndësinë e punës së palodhur. Kushdo që nuk e kuptonte këtë nevojë për të punuar "zgjohej" menjëherë.

Nuk kishe zgjidhje me Klopp, ai ishte shumë kërkues. Nëse nuk arrije në topin e dytë, ai do të bërtiste dhe herën tjetër duhej të bëje gjithçka për të arritur atje shumë shpejt (qesh). Nëse nuk do të vrapoje gjithë ditën, do të ishe në stol ose në tribunë brenda një kohe të shkurtër".