Nuk ka vend për të vdekurit pasi varrezat në Turqinë dhe Sirinë e goditur nga tërmetet janë mbushur plot.

Trupat grumbullohen në stadiume ose parkingje për identifikim. Këto ambiente janë tejmbushur.

E sakaq, po sillen arkivolë dhe po gërmohen varreza masive, sepse tek ato ekzistuese, nuk ka hapësira të tjera për varre.

The Guardian ka realizuar një reportazh në zonën e tragjedisë që noa.al jua sjell më poshtë:

Në varrezat Nurdağı në provincën turke të Gaziantep, në kufirin me Sirinë, së shpejti nuk do të ketë më vend për të vdekurit.

Varret e sapogërmuara janë shënuar me gurë varri bosh, me vetëm copa pëlhure të grisura të mbledhura nga rrobat e viktimave për t’i identifikuar ato.

Në rrugë jashtë, dhjetëra trupa shtrihen të grumbulluar mbi njëri-tjetrin në një varg kamionësh, në pritje për t’u varrosur.

Të paktën pesë imamë kanë nxituar në Nurdağı për të drejtuar një kortezh zinxhir funeralesh masive, ndonjëherë për deri në 10 viktima në të njëjtën kohë.

Zyrtarët sollën  arkivolë të tërhequr nga agjencitë funerale nga fshatrat fqinjë dhe deri në Stamboll, për të siguruar një vend prehjeje për numrin dërrmues të kufomave që po nxirren vazhdimisht.

Pesë ditë pasi dy tërmete të fuqishme tronditën Turqinë jugore në fatkeqësinë më të keqe natyrore të vendit në një gjeneratë, numri i të vdekurve ka shkuar në afro 23,000 dhe Nurdağı dhe qytetet në të gjithë Turqinë jugore dhe Sirinë veriore janë skena të niveleve apokaliptike të shkatërrimit.

Ndërsa nxjerrja e trupave po vazhdon, varrimet po vazhdojnë ditë e natë.

Në pritje të mbërritjes së mjekëve ligjorë dhe prokurorëve, banorët e disa qyteteve të Turqisë kanë grumbulluar trupa nëpër stadiume apo parkingje për t’u dhënë të afërmve mundësinë që të identifikojnë shpejt të dashurit e tyre përpara se t’u lëshohet certifikata e vdekjes.

Në Kahramanmaraş, punonjësit e urgjencës vazhduan të krehin rrënojat, duke gjetur shpesh vetëm pjesë trupash.

Një punonjëse e urgjencës përshkroi se si ishte përpjekur të identifikonte një krah të prerë, duke ua treguar atë familjeve të ndjera me shpresën për të përdorur ngjyrën e manikyrit të mbetur për t’i vënë një emër të ndjerit.

“Këtu kam jetuar”, thotë Sadi Uçar, duke treguar shtëpinë e tij të dëmtuar. “Ishte një apartament i ri. Ne sapo blemë dy apartamente disa javë më parë", tregon i riu.

Ndërsa rrëfimi më pas rrënqeth: Blemë një apartament për familjen dhe fëmijët e mi dhe një për babin dhe nënën time. Nëna dhe babai im jetonin dy ndërtesa më larg. Ata duhej të vinin te pallati ynë këtë javë. Madje unë me nënën para pak ditësh vendosëm dhe perdet atje. Por kur ra tërmeti, shtëpia e mamasë dhe babait tim u shemb.

Gërmova rrënojat me duar dhe nxora nënën dhe babanë. Të vdekur. Më pas, më duhej t’i varrosja, sërish me duar.”

***

Në distriktin Afrin në veri-lindje të Sirisë, një varrezë është zgjeruar me varreza masive të improvizuara. Në qytetin jugor të Turqisë, Osmaniye, një varrezë mbeti pa hapësirë, ndërsa jashtë Kahramanmaras, pranë epiqendrës së tërmetit, një varrezë e improvizuar u tejmbush me aq shumë kufoma sa dërrasat prej druri dhe blloqet e betonit të mbledhura nga mbeturinat u përdorën që të shërbenin si gurë varri.

***

Presidenti Recep Tayyip Erdoğan tha sot pasdreke (e premte 10 shkurt) se numri i personave që humbën jetën në tërmetet me qendër Kahramanmaraş ishte 19,388 dhe numri i të plagosurve ishte 77,711.

Numri i vdekjeve në Sirinë fqinje ka arritur në 3,377, duke çuar një numër të përgjithshëm të vdekjeve prej 22,765.