18 mijë e 342 persona humbën jetën dhe 74 mijë e 242 persona u plagosën nga tërmetet me qendër në Kahramanmaraş, Turqi, të cilët cilësohen si “katastrofa e shekullit”.

Sakaq në Siri raportohet për 3.377 të vdekur duke çuar numrin e përgjithshëm deri tani në 22 719.

Shifra ka tejkaluar 20,000 që Organizata Botërore e Shëndetësisë kishte parashikuar fillimisht kur goditi tërmeti për herë të parë. Por numri i të vdekurve pritet të rritet në ditët në vijim pasi ka ende njerëz nën rrënojat e mijëra ndërtesave të shembura.

Katastrofa në Turqi dhe Siri renditet si fatkeqësia e shtatë më vdekjeprurëse natyrore këtë shekull, përpara tërmetit dhe cunamit të Japonisë në vitin 2011 dhe duke iu afruar 31,000 të vrarëve nga një tërmet në Iranin fqinj në 2003.