Lidhur me fjalët e presidentit amerikan Joe Biden mbi Kinën në mesazhin e tij përpara kombit të martën, zëdhënësja e MPJ-së kineze Mao Ning vuri në dukje në një konferencë shtypi të zhvilluar të mërkurën që Kina nuk i shmanget ose frikësohet konkurrimit, por kundërshton që marrëdhëniet Kinë-ShBA të përcaktohen vetëm si marrëdhënie konkurrence.

Zëdhënësja theksoi që Kina ka qenë gjithmonë e mendimit që marrëdhëniet kino-amerikane nuk janë një lojë ku fituesi merr gjithçka.

“Sukseset e Kinës dhe të ShBA-së janë në fakt mundësi të mira dhe jo sfida për njëra-tjetrën.

Bota e gjerë ka mjaft hapësirë për zhvillimin e Kinës e të ShBA-së dhe lulëzimin e përbashkët. Kina nuk e shmang dhe nuk e ka frikë konkurrimin, por kundërshton që marrëdhëniet kino-amerikane të përkufizohen vetëm me fjalën ‘konkurrencë’.

Nën flamurin e konkurrimit, njollosja ose kufizimi i së drejtës për zhvillim të një vendi tjetër, e madje dëmtimi i zinxhirit global të prodhimit dhe furnizimit, ky nuk është veprimi i duhur nga një fuqi e madhe,” tha Mao Ning për mediet.

Ndërkohë vijojjnë reagimet lidhur me anijen ajrore kineze pa pilot.

Të martën Xu Xueyuan, i ngarkuar me punë i ambasadës kineze në ShBA ka shprehur kundërshtimin e fortë të Kinës dhe u kërkoi Shteteve të Bashkuara të mos ndërmarrin asnjë veprim që mund të përshkallëzojë dhe të ndërlikojë situatën, duke shtuar se Kina ruan të drejtën për reagim të mëtejshëm nëse nevojitet.