Ekipet e shpëtimit po kërkojnë me dëshpërim për të mbijetuar nën rrënojat e ndërtesave në Turqinë jugore dhe Sirinë veriore pas dy tërmeteve të mëdha të hënën.
Më shumë se 7200 njerëz janë vrarë, por ka paralajmërime se numri i të vdekurve mund të vazhdojë të rritet, raporton noa.al duke cituar BBC.
Autoritetet turke thonë se më shumë se 5,400 njerëz kanë vdekur në Turqi dhe 26.721 të tjerë janë plagosur në dhjetë provinca turke pas dy tërmeteve të forta që dje goditën pjesën jugore të vendit, ndërsa më shumë se 1,800 janë vrarë nga tërmeti në Siri. Edhe atje ka mijëra të plagosur.
Dje herët në mëngjes, një tërmet me magnitudë 7.7 goditi provincën Kahramanmaraş. Më pas, rreth nëntë orë më vonë, një tërmet me magnitudë 7.6 me qendër në Kahramanmaraş përsëri dridhi rajonin, duke prekur disa provinca të tjera, përfshirë Adana, Adıyaman, Diyarbakır, Gaziantep, Hatay, Kilis, Malatya, Osmaniye dhe Şanlıurfa.
Tërmeti u ndje edhe në disa vende të rajonit, përfshirë Libanin dhe Sirinë.
Gjithsej afro 60 mijë punonjës të ekipeve të shpëtimit janë duke punuar në zonë, përfshirë 3.200 persona nga 65 vende të botës, përfshirë Shqipërinë dhe Kosovën.
Operacionet e kërkim-shpëtimit vazhdojnë
Sot më herët, presidenti turk, Recep Tayyip Erdoğan, nga Qendra Shtetërore e Koordinimit të Informacionit në kryeqytetin Ankara tha se “fakti që mbi 8 mijë qytetarë tanë janë shpëtuar nga rrënojat është lehtësimi ynë më i madh”.
Erdoğan njoftoi se Turqia vendosi të shpallë gjendjen e jashtëzakonshme për tre muaj në dhjetë provinca, në mënyrë që operacionet e kërkim-shpëtimit dhe përpjekjet e tjera të kryhen me shpejtësi.
“Ne po përballemi me një nga fatkeqësitë më të mëdha jo vetëm të historisë së republikës, por edhe të gjeogradisë sonë dhe të botës”, tha presidenti Erdoğan.
Zv/presidenti turk, Fuat Oktay, nga ana e tij, njoftoi se gjithsej 380.500 persona të prekur u strehuan në konviktet e Ministrisë së Arsimit dhe të Ministrisë së Rinisë dhe Sporteve.
Drejtori i përgjithshëm i tërmeteve dhe reduktimit të rrezikut në AFAD, Orhan Tatar, tha se rreth 5.775 ndërtesa u shembën nga tërmetet. Ai po ashtu theksoi se zona e ndikimit të tërmeteve mbulon afër 110 mijë kilometra katrorë.
Ndërkaq, ministri i Mjedisit, Urbanizimit dhe Ndryshimeve Klimatike, Murat Kurum, tha se rreth 13.5 milionë qytetarë janë të prekur drejtpërdrejt nga tërmetet.
“Fatkeqësia më e madhe” që nga tërmeti i vitit 1939 në Erzincan
Turqia është duke mbajtur një periudhë 7-ditore zie kombëtare pas tërmeteve vdekjeprurëse.
Të gjitha ngjarjet sportive në vend janë pezulluar deri në një njoftim të dytë dhe të gjitha shkollat në Türkiye do të mbyllen deri më 13 shkurt, ndërsa shkollat në dhjetë provincat e prekura deri më 20 shkurt.
Partitë e përfaqësuara në parlament, respektivisht Partia për Drejtësi dhe Zhvillim (AK), Partia Popullore Republikane (CHP), Partia e Mirë (IYI), Partia e Lëvizjes Nacionaliste (MHP) dhe Partia Demokratike Popullore (HDP), gjithashtu lëshuan një deklaratë të përbashkët për lëkundjet.
“Si përfaqësues të Kryesisë së Parlamentit Turk dhe pesë partive politike që kanë grupe në parlament, ne qëndrojmë pranë dhe në shërbim të qytetarëve tanë”, thuhet në deklaratë.
Dje, presidenti Erdoğan tha se Türkiye me tërmetin u trondit nga “katastrofa më e madhe” që nga tërmeti i vitit 1939 në Erzincan.
“Shteti ynë ka marrë masa me të gjitha institucionet që nga tërmeti. Të gjitha burimet janë mobilizuar”, tha Erdoğan në zyrën e AFAD-it në kryeqytetin Ankara, ku po koordinonte punën e kërkim-shpëtimit dhe të ndihmës.