Derbi i 178-të i Madoninës në Serie A ofron mundësi të mëdha si për Interin ashtu edhe Milanin. Zikaltrit, të cilët “formalisht” do të presin kushërinjtë e tyre në “San Siro”, mund t’iu japin goditjen fatale kuqezinjve, të cilët vijnë nga një moment katastrofik, por ëndërrojnë për një fitore kthese në derbi.

Ideja e Simone Inzaghit do të jetë të ngrihet si “raketë” për të përfituar nga brishtësia e Milanit (vetëm Cremonese dhe Sampdoria kanë pësuar më shumë gola se skuadra e Stefano Piolit). Interi është skuadra që ka shënuar më shumë në 30 minutat e para të ndeshjeve, 14 gola, ashtu si Lazio.

Për ta bërë këtë ndaj “Djallit” do të mbështetet te Lautaro Martinez, i cili kur sheh kuqezinjtë emocionohet: 6 gola të shënuar ndaj Milanit në karrierën e tij, vetëm kundër Cagliarit (8 gola) ia ka dolë më mirë. Për sulmuesin argjentinas do të ishte një mundësi për t’u afruar edhe më shumë me golashënuesin e huaj më të mirë në historinë e Interit në derbi, që është Nyers me 11 gola.

Jo se Pioli është pa kampionë, Olivier Giroud ka shënuar në të dyja kampionatet e tij të para si kuqezi në dy derbi (3 gola në total). Asnjë lojtar tjetër i Milanit nuk e ka gjetur kurrë golin në të tria ndeshjet e para kundër zikaltërve në Serie A, që kur filloi të llogaritej me 3 pikë fitorja.

Duke pasur parasysh vështirësitë e kuqezinjve, shumë e shohin Interin si favorit (por në derbi, e dini, nuk vlen domosdoshmërisht forma aktuale), edhe shifra të tjera duket se sugjerojnë këtë skenar. Në këtë kampionat, zikaltrit kanë pësuar vetëm 5 gola në ndeshjet në shtëpi (si Roma), askush nuk ka bërë më mirë.

Nga ana tjetër, Milani ka vendosur rekordin absolut negativ të golave ​​të pësuar në një muaj të vetëm: në janar janë 18, golat e pësuar nag kampionët italianë. Kjo është fantazma e humbjes së katërt radhazi, duke marrë parasysh të gjitha garat, që nuk i ka ndodhur Milanit nga viti 2017, kur Vincenzo Montella ishte aty si trajner.

Është gjithashtu e vërtetë që zikaltrit kanë humbur dy derbet e tyre të fundit në shtëpi, në Serie A, dhe kuqezinjtë, për herë të parë që nga 2010-2011 (trajneri ishte Massimiliano Allegri), mund t’i fitojnë të dyja ndeshjet derbi në një sezon të vetëm të Serie A.