Mes pyetjeve “me spec” të gazetarëve në konferencën për shtyp, trajneri i ri i kuqezinjve, braziliani Sylvinho, iu përgjigj edhe për qasjen e tij taktike. Duke qenë se ka punuar me disa trajnerë shumë të njohur si Pep Guardiola, Roberto Manchini, Arsène Wenger dhe Tite, iu kërkua se nga cili ka marrë më shumë. Gjatë përgjigjes, e kaloi “topin” në fushën e lojtarëve:

“Kam marrë pak nga të gjithë. Kohë më parë kam pasur fatin të punoj me trajnerë si Pep Guardiola, Roberto Manchini, Wenger dhe Tite për drejtimin e Brazilit.  Nëse do të jesh trajner duhet të bësh gjërat që ti i beson. Ajo që unë nuk pranoj dot janë lojtarët që nuk japin maksimumin në fushën e lojës.

Kur futesh në fushë duhet të japësh 100% e më tepër, vetëm kështu fitohet në futboll. Pra, ana taktike, skemat e lojës, stili si trajner kanë rëndësinë e tyre, por janë futbollistët që luajnë në fushë. Ata duhet të japin shpirtin në fushë. Jo më kot njerëzit dhe fansat ua kërkojnë këtë gjë lojëtarëve”.

Ndërkohë, Pablo Zabaleta, që ka luajtur si futbollist me Manchester City, West Ham dhe Espanyol, e ka veshur 58 herë fanellën e kombëtares aargjentinase, e krahasoi atmosferën rreth kombëtares në Shqipëri me atë në vendin e tij:

“Jam shumë i lumtur që Argjentina na dha kënaqësi kaq të madhe. I njoh shumicën e lojtarëve të kombëtares. Shoh te Shqipëria atë që shoh te tifozët e Argjentinës. Ky vend e dashuron futbollin, kjo është arsyeja pse jemi këtu. Duam të sjellim eksperiencën tonë. Shqipëria ka lojtarë me potencial të lartë. Disa prej tyre luajnë luajnë në Angli dhe Itali.

Mbi të gjitha duhet të kemi mentalitetin e duhur. Lojtarët duhet të kenë besim te vetja e tyre, duhet të jenë të bindur që do të sjellin sukses. Shpresoj t’i frymëzojmë që të japin më shumë, që të bëjnë krenarë tifozët dhe kombin. Duhet të sjellim mentalitetin e duhur. Besoj se do kemi miksin e lojtarëve të mirë me mentalitetin e duhur”.