Transmetuar më 21-12-2022, 19:33

Elbasan- Arrestohet nga Policia Geraldo Nela,trupë shërbimi pranë Komisariatit të Policisë Cërrik. 24 vjeçari Nela Vodhi 30 mijë Euro në banesë e shtetasit Syrja Kuqja në Belsh.

Ngjarja ndodhi një ditë më parë nga një kontroll i pa autorizuar i banesës.

Fill pas kësaj ngjarje, familjarët denoncuan në Polici.

Sot Drejtoria Rajonale e AMP-së Elbasan-Korçë, publikoi njoftimin e arrestimit në të cilin citohet:

Më datë 21.12.2022, nga Drejtoria Rajonale e AMP-së Elbasan-Korçë, nën drejtimin e Prokurorisë Pranë Gjykatës së Shkallës së Parë Elbasan, u krye arrestimi në flagrancë për veprën penale “Vjedhja e kryer duke shpërdoruar detyrën” parashikuar nga neni 135 i Kodit Penal, i punonjësit të policisë:

Inspektor Geraldo Nela 24 vjeç, me detyrë Trupë shërbimi pranë Komisariatit të Policisë Cërrik.

Arrestimi i këtij shtetasi u krye në kushtet e flagrancës në kuadër të veprimeve procedurale të autorizuara nga ana e Prokurorisë pranë Gjykatës së Shkallës së Parë Elbasan, në lidhje me kallëzimin e shtetasit S. K., me banim në Marinzë, Belsh, i cili në kallëzimin e tij pretendonte se gjatë një kontrolli të ushtruar pranë familjarëve të tij, më datë 20.12.2022, këtij shtetasi i ishte vjedhur një shumë prej 30 mijë euro në ambjentet e jashtme të banesës në pronësi të tij.

Në lidhje me këtë ngjarje dhe si rezultat i punës hetimore të pandërprerë, u bë e mundur kapja dhe arrestimi në flagrancë i punonjësit të policisë inspektor Geraldo Nela.

Gjithashtu, në cilësinë e provës materiale u bë sekuestrimi i shumës prej 30 mijë euro që ky punonjës policie ia kishte vjedhur shtetasit Syrja Kuqja.

Materialet hetimore janë referuar në Prokurorinë pranë Gjykatës së Shkallës së Parë Elbasan për veprime të mëtejshme.