Qytetarë të shoqërisë civile zhvilluan sot një protestë para ambasadës së Serbisë në Tiranë në mbështetje të Kosovës, pas tensioneve në veri të vendit me Serbinë. Me pankarta nëpër duar qytetarët kërkojnë zgjedhje për Kosovën.

Barrikadat e vendosura në veri të vendit vazhdojnë të mbajnë rrugët në drejtim të kufirit të Jarinjës dhe Bërnjakut prej shtatë ditësh të bllokuara.

Serbët lokalë kanë ngritur edhe një tjetër barrikadë krejt afër fshatit Çabër në drejtim të Zubin Potokut, ku kanë vendosur dy kamionë.

Si e përballon ndarjen, sipas shenjës së horoskopit?

Dyqanet pothuajse të gjitha janë të mbyllura përveç atyre të ushqimeve dhe barnatoreve, ndërkaq nëpër shkolla e fakultete mësimi nuk po mbahet.

Kjo situatë me dyqane dhe shkolla në veri do të zgjasë së paku deri më 18 dhjetor me urdhër të shtabit të krizës të formuar ditë më parë e që udhëhiqet nga kryetari i Listës Serbe, Goran Rakiç.

Qëllimi i serbëve është që para botës të paraqitet “jetë e paralizuar” dhe situatë sa më e zymtë në atë pjesë.

Ndryshe, situata e përgjithshme e sigurisë në veri të vendit është e brishtë. Qytetarët serbë nuk po lejohen të lëvizin lirshëm nga bandat kriminale që po qëndrojnë në barrikada. Ndërsa, siç ka mësuar KosovaPress Policia e Kosovës mbrëmë ka arrestuar një ish-polic serb nën dyshimet për krime lufte gjatë luftës së fundit në Kosovë. Pjesëtarët e Policisë së Kosovës po vazhdojnë patrullimin e tyre nëpër zonat me popullatë të përzier në veri të Mitrovicës, duke ofruar rend dhe siguri për të gjithë qytetarët pa dallim.

Barrikadat në dy pikat kufitare me Serbinë, Jarinjë dhe Bërnjak u ngritën më 10 dhjetor nga grupe kriminale serbe, si shenjë proteste ndaj arrestimit të ish-policit serb, Dejan Pantiç, nga autoritetet e rendit në Kosovë.

Ai dyshohet se organizoi sulm terrorist në zyrat e Komisionit Qendror të Zgjedhjeve (KQZ) në veri të Kosovës. Kryeministri i Kosovës, Albin Kurti, ka thënë se pret që misioni paqeruajtës i NATO-s, KFOR, t’i largojë barrikadat në veri. Ndërkohë që ministri i Punëve të Brendshme, Xhelal Sveçla ka thënë se Policia e Kosovës i ka kapacitetet e duhura të veprojë në këtë drejtim.

Thirrje për largimin e barrikadave kanë bërë edhe ambasada e SHBA-së në Prishtinë dhe ajo në Beograd, duke thënë se arrestimi i Pantiçit po përdoret si justifikim për bllokime të paligjshme të rrugëve.

Grupet kriminale serbe të maskuar kanë sulmuar Policinë e Kosovës, gazetarët dhe misionin e BE-së, EULEX. Si pasojë, një polic i Kosovës është lënduar, për çka ka marrë edhe trajtim mjekësor.