Në foto: Fëmijët largohen pasi bëjnë nderimet e tyre përpara statujave prej bronzi të liderëve të ndjerë Kim Il Sung dhe Kim Jong Il në kodrën Munsu në Pyongyang, Koreja e Veriut, 7 korrik 2018

Në vitet 2000, koreano-veriorët filluan t’i emërtonin fëmijët e tyre ndryshe pasi ata mësuan pak nga pak për botën e jashtme, thotë për RFA një banor i Koresë së Veriut.

Në të kaluarën, koreano-veriorët inkurajoheshin t’u vendosnin fëmijëve të tyre emra patriotikë që kishin një kuptim ideologjik apo edhe militarist, si Chung Sim (besnikëri), Chong Il (armë), Pok Il (bombë) ose Ui Song (satelit).

Megjithatë, nvitet e fundit, ndërsa populli është bërë më i hapur ndaj botës së jashtme, koreano-veriorët i kanë emërtuar fëmijët e tyre me emra më të butë dhe më emocionues që janë më të lehtë për t’u thënë, të tilla si A Ri (i dashur), So Ra (guaska kërpudhash) dhe Su Mi (super bukuroshe), thonë burime brenda vendit.

Në vend të emrave që mbarojnë me bashkëtingëllore më të forta, fëmijëve u jepen emra që mbarojnë me zanore më të buta, që janë më shumë si emra që u jepen fëmijëve në Korenë e Jugut.

Por kohët e fundit, autoritetet e Koresë së Veriut po e frenojnë këtë prirje, duke u kërkuar qytetarëve me emra më të butë të ndryshojnë në më ideologjikë, madje edhe emrat e fëmijëve të tyre, nëse nuk janë mjaft "revolucionarë", thonë burimet.

"Banorët po ankohen se autoritetet po i detyrojnë njerëzit të ndryshojnë emrat e tyre sipas standardeve të kërkuara nga shteti," tha një banor i provincës verilindore të Hamgyong-it të Veriut për Shërbimin Korean të RFA në kushte anonimiteti për të shmangur hakmarrjen.

“Duke filluar nga muaji i kaluar, në mbledhjen e banorëve të njësisë së lagjeve janë lëshuar vazhdimisht njoftime për korrigjimin e të gjithë emrave pa bashkëtingëllore fundore.

Njerëzit me emra që nuk kanë një bashkëtingëllore fundore kanë kohë deri në fund të vitit për t’i shtuar kuptime politike emrit të tyre për të përmbushur standardet revolucionare”, tha ai.

“Antisocialistë”

Në takime dhe njoftime publike, zyrtarët kanë shkuar aq larg sa të udhëzojnë të rriturit dhe fëmijët të ndryshojnë emrat e tyre nëse konsiderohen shumë të butë ose të thjeshtë, dhe se emrat pa bashkëtingëllore fundore janë "anti-socialistë", tha një burim tjetër.

Shumë prindër "po tregojnë ngurrim të fortë", tha burimi.

Qeveria ka kërcënuar me gjobë këdo që nuk përdor emra me kuptime politike, i tha RFA-së një banor në provincën veriore të Ryanggang në kushte anonimiteti me qëllimin për të folur lirshëm.

“Urdhëri i autoritetit gjyqësor për ndryshimin e menjëhershëm të emrave antisocialistë është theksuar në çdo takim të banorëve që nga tetori”, tha ai, duke shtuar se nuk dihet nëse qeveria do të vendosë realisht gjoba dhe sa mund të jenë ato.

Emrat nuk duhet të pasqyrojnë tendencat në Korenë e Jugut, për të cilën Koreja e Veriut thotë se është "një kopje e kulturës dekadente perëndimore Yankee", sipas burimit të dytë.

“Autoritetet kritikuan breza të shumtë të familjeve që nuk hezituan t’i emërtonin fëmijët e tyre me një përzierje emrash kinezë, japonezë dhe koreano-jugorë në vend të atyre të Koresë së Veriut,” tha ai.

Në mënyrë private, banorët pyesin me sarkazëm nëse duhet të marrin emra të modës së vjetër si Yong Chol, Man Bok ose Sun Hui, tha burimi i dytë.

Për folësit anglisht, këto mund të tingëllojnë afërsisht po aq të modës së vjetër sa emrat si Gladys, Mildred ose Eustace.

"Nëse të qenit lakuriq dhe të jesh i uritur është socializëm i vërtetë, ne jemi absolutisht kundër tij’," tha burimi i dytë.

Shumë njerëz po shprehin mosmiratim të fortë “për tiraninë e autoriteteve që detyrojnë kolektivizmin, duke thënë, ‘Si nuk mund t’u lejohet njerëzve të emërtojnë veten? A jemi në fakt pjesë mekanike apo bagëti?’”