Mes të ftuarve në shpërndarjen e çmimeve të "Globe Soccer" ishte edhe Zlatan Ibrahimovic, i cili me padurim pret të kthehet në fushë në fillim të vitit 2023. Suedezit iu dha çmimi i karrierës ("por karriera ime nuk ka mbaruar, jo, relaksohuni… Unë jam ende duke luajtur").

Mes provokimeve dhe të qeshurave, sulmuesi karizmatik i Milanit hap librin e kujtimeve, por e shikon të ardhmen me gjithnjë e më shumë pasion: "Lojtarët e rinj që bëhen të fortë menjëherë janë prerogativë e disa skuadrave të rëndësishme që kanë më shumë para për të shpenzuar.

Por në fund, investimet i bëjnë të gjithë të rriten. Klubet që nuk kanë para duhet të punojnë ndryshe, në një mënyrë inteligjente. Këtu kam parasysh përdorimin e lojtarëve me përvojë për t’i ndihmuar të rinjtë të rriten. Pastaj, sigurisht, nëse jeni PSG, krijoni një ‘Dream Team’. Mendimi im për Kupën e Botës? Është e vështirë të mos jesh në Katar. Ndoshta do t’i shikoj të gjitha ndeshjet. Ose ndoshta do të shikoj veten duke u stërvitur".

Në planin personal, Zlatan ka gjithmonë të njëjtin entuziazëm: "Pasioni është ai që të mban përpara. Unë jam 41 vjeç, nëse nuk do të kisha pasion nuk do të mbijetoja. Gjithçka shkon shpejt, gjithmonë duhet të punoj shumë, të stërvitem, të rikuperohem. Pasion, pasion, pasion. Kur humbet pasioni, humbet disiplina. Frymëzuesi im i vërtetë është Mohamed Ali, por nëse do të më duhej të zgjidhja një lojtar si model, do të thosha Ronaldon, fenomenin, sepse ai më bëri të pasionuar për futbollin”.

Më pas, Ibra kujton anekdotën e takimit të parë me Fabio Capellon: "Më bëri të shkëlqyeshëm, por edhe më theu… Kur mbërrita te Juve, ditën e parë isha entuziast për të qenë më në fund në një ekip të madh. Unë shoh Capellon dhe i them: Përshëndetje, mirëmëngjes zotëri! Ai po lexonte ‘Gazzetta dello Sport’, nuk i ngriti sytë dhe nuk më ktheu përgjigje. Dhe pas 10 minutash ende po prisja… Kam mësuar shumë prej tij, më mësoi disiplinën”.

Duke parë karrierën e tij të gjatë: "Kam pasur mundësinë të luaj me dhe kundër lojtarëve më të mirë në botë. Në klubet më të mira. Bëra gjithçka për të nxjerrë më të mirën nga vetja. Disa thonë se mund të kisha bërë më shumë, po çfarë? A isha konkurrues qysh fëmijë? Sigurisht. Pse të jesh i mirë, nëse mund të jesh më i miri?" Ibra më pas bëri disa deklarata për Milanin e tij:

"Ne jemi rritur si skuadër, Maldini dhe Massara kanë bërë një punë të madhe. Ne gjithmonë besojmë te titulli, pse nuk duhet të besojmë? Napoli po bën më mirë, ju mund ta shikoni nga renditja, por pjesa e dytë e sezonit është më e rëndësishme se e para. Liga e Kampionëve është gjithmonë e vështirë… Ndeshja kundër Tottenhamit? Nuk ka favoritë, duhet të ndihemi mirë në këtë moment".