Kur juria hyri në Gjykatën e Chester dhe zuri vendet përkatëse të hënën pasdite, një nga fytyrat e para që do të vihej re ishte ajo e trajnerit të Manchester City, Pep Guardiola. Guardiola, i shfaqur përmes video-lidhjes nga jashtë, priste me durim të jepte një deklaratë personale mbi çështjen e Benjamin Mendy, futbollistit të tij të pezulluar që nga momenti kur u ngritën disa akuza për**unimi ndaj francezit.

Ishte hera e parë që një punonjës aktual i City, klubit për të cilin Mendy ka luajtur 50 herë, jepte dëshmi në një gjyq që tani ka zgjatur gati tre muaj. Shumë anëtarë të stafit të ekipit të parë të klubit nuk e dinin që Guardiola do të jepte dëshmi dhe City nuk pranoi të komentonte nëse ishin në dijeni se trajneri i tyre do të dilte në gjykatë të hënën.

Mendy nuk ka luajtur për City që nga gushti 2021. Ai u shpall i pafajshëm për një akuzë për për**unim muajin e ardhshëm dhe mohon shtatë akuza të tjera të ngjashme. Guardiola, i veshur me një bluzë gri të thjeshtë, tha në gjykatë se 28-vjeçari francez është një “djalë vërtet i mirë dhe shumë bujar”.

Kur u pyet pse kishte vendosur të jepte dëshmi, Guardiola tha se kjo ishte për shkak se "Mendy ma kërkoi". Më pas trajneri spanjoll vazhdoi të thoshte se “nuk e kishte idenë” se çfarë bënte Mendy kur nuk luante futboll, sepse ai “nuk është babai i tij”. Guardiola tha gjithashtu se do të ishte “e vështirë të gjeje dikë në dhomat e zhveshjes që do të fliste keq për Mendy”.

Dëshmia e tij ka zgjatur rreth 10 minuta dhe nuk është marrë në pyetje nga prokuroria. Eleanor Laws KC, mbrojtësja kryesore e Mendy i bëri Guardiolës një sërë pyetjesh, duke filluar nga arsyeja pse City nënshkroi me lojtarin në verën e vitit 2017 deri tek numri i lëndimeve që Mendy ka pësuar që kur iu bashkua klubit anglez për 52 milionë stërlina nga Monaco.

Përpara se të jepte dëshminë e tij, trajnerit të “qytetarëve” iu kërkua të betohej se do të thoshte të vërtetën. Atij iu kërkua ta përsëriste betimin, pasi e kishte dëgjuar gabim një nga rreshtat dhe e kishte thënë gabimisht.

Pasi konfirmoi rolin e tij si trajner i City dhe përshkroi se sa kohë ka punuar në klub, 51-vjeçarit iu kërkua të përshkruante pse nënshkruan me Mendy. Monaco e kishte eliminuar City nga Liga e Kampionëve, kur Guardiola vuri re mbrojtësin e majtë: “Ne ishim vërtet të impresionuar si klub, ai kishte potencialin për të luajtur me Manchester City”.

Guardiola më pas u ftua për të përshkruar personalitetin dhe karakterin e Mendy: “Ai është një djalë vërtet i mirë. Mendoj se është një djalë bujar dhe u përshtat shumë shpejt me ekipin. Unë do të thoja se ishte i lumtur kur mund të ndihmonte lojtarët e tjerë.

Më kujtohet, kur i kërkonim diçka për shokun e tij ose për klubin, ai ishte gjithmonë në gjendje ta bënte. Po kështu, ai është një djalë i qeshur. Ai ishte lojtari më i lumtur, do të thosha më shumë se kudo, në seancat stërvitore”.

Guardiola më pas u pyet se kur Mendy theu rregullat e bllokimit të COVID-19 në fillim të vitit 2021. Ai tha se nuk mund të mbante mend se kush i tha se kishte ndodhur, por shpjegoi se "nuk ishte i lumtur" dhe foli me lojtarin për këtë. “Ai pranoi se nuk bëri gjënë e duhur”, – shtoi Guardiola.

Kur u shty nga zonja Laws KC nëse ai e dinte që Mendy e shijonte jetën e natës, Guardiola iu referua të gjithë skuadrës së tij në vend që të veçonte mbrojtësin: "Unë mund t’i shoh lojtarët kur jemi bashkë në seancat stërvitore, në jetën e tyre private, nuk e di se çfarë bëjnë. Unë nuk jam aktiv në mediat sociale, kështu që nuk i ndjek lojtarët e mi virtualisht.

Nuk e di se çfarë po bëjnë ata jashtë kontrollit tim të seancave stërvitore dhe lojërave. Jemi 22 lojtarë, nuk mund t’i kontrolloj jashtë fushës. Po, nëse nuk janë gati të bëjnë stërvitje, do t’i pikasja menjëherë. Kjo është ajo për të cilën unë kujdesem dhe i kushtoj vëmendje".