Ylli i Wnba, Brittney Griner, po e humb shpejt shpresën për të qenë në gjendje të kthehet në shtëpi, ndërsa vazhdon izolimin në një burg rus, pasi u arrestua shkurtin e kaluar. Asaj  iu gjet në posedim vaj kanabisi në aeroportin Sheremetyevo të Moskës dhe u dënua me 9 vite burg.

Burri i saj, Cherelle tha për CBS: “Ajo po kalon momentin më të vështirë të jetës. Me sa duket, gruaja ime është peng, – shpjegoi Cherelle. – Duke ditur që qeveria jonë dhe një qeveri e huaj janë ulur dhe po negociojnë për lirimin e saj, kjo e bën Brittney peng”.

Cherelle tha se ishte i zemëruar pas takimit me Presidentin Joe Biden, i bindur se donte të bënte gjithçka që mundi për ta sjellë Brittney në shtëpi, por më vonë kuptoi se do të duhej miratimi i presidentit rus Vladimir Putin që ajo të lirohej.

Ai gjithashtu tha se dyshonte se rëndësia e Brittney si një sportiste elitare amerikane është pjesë e arsyes pse qeveria ruse e trajtoi aq ashpër. Bashkëshorti i saj citoi një numër njerëzish që kishin raportuar se ishin kapur në Rusi me të njëjtën akuzë, duke u dënuar vetëm me gjobë.

Shqetësimi më i madh i Cherelle është se Brittney thjesht po përpiqet t’ia dalë ditë pas dite: “Ajo tashmë ka vuajtur shumë. Pas telefonatës së parë u ndjeva i inkurajuar që ajo mund t’i mbijetonte kësaj drame. Këtë herë, kur e mbylla telefonin, mendoj se kam qarë për rreth dy, tri ditë rresht.

Ishte telefonata më rrëqethëse që kisha bërë ndonjëherë. Ajo ndjehej sikur nuk ishte mirë. Nuk e di nëse i ka mbetur diçka brenda saj për të vazhduar të zgjohet çdo ditë dhe të jetë në një vend ku nuk ka kush ta ngushëllojë. Është në momentin më të vështirë të jetës së saj. Ajo ka shumë frikë se mos harrohet në Rusi, më thotë gjëra të tilla si, "jeta ime nuk ka më rëndësi".

Tani kam frikë që, nëse shkëmbimi i frikshëm i të burgosurve nuk ndodh brenda dy javësh, ajo mund të përfundojë në punë të detyruar. I thashë se jeta e saj është e rëndësishme për mua, se dua ta kthej në shtëpi dhe do të vazhdoj të lutem çdo ditë që njerëzit e besuar për fatin e saj të kenë mëshirë”.