Me Interin ai ka bërë vetëm tri paraqitje në ndeshjet zyrtare, deri më tani: dy në Serie A dhe një në Champions League. Mirëpo, pavarësisht këtyre vetëm 30 minutave në fushë me fanellën zikaltër, Kristjan Asllani tashmë ka pushtuar zemrat e tifozëve, të cilët në rrjetet sociale kërkojnë më shumë aktivizim në fushën e blertë. Tani, pas dëmtimit të Marcelo Brozovic me Kroacinë, koha e shqiptarit duket shumë afër.

Duke folur për ekipet kombëtare, ish-lojtari i Empolit, i papërdorur në Ligën e Kombeve nga Edy Reja ndaj Islandës, nuk po kërkon asnjë lloj polemike me trajnerin e tij. Përkundrazi, mendon për të mirën e ekipit, e vuan shumë barazimin “in extremis” në Tiranë ndaj Islandës. Në intervistën për "Tuttosport", 20-vjeçari ynë kuqezi u shpreh:

"Më vjen shumë keq, sepse ne ishim në epërsi numerike që në fillim, me një lojtar më shumë në fushë (Aron Gunnarsson u përjashtua nga radhët e mysafirëve në minutën e dhjetë të pjesës së parë). Duhej ta kishim mbyllur ndeshjen, por nuk ndodhi fatkeqësisht".

Ju keni qëndruar në pankinë gjatë gjithë ndeshjes. Ishe i lodhur pas paraqitjes në Izrael, ku luajte 67 minuta, apo ishte një zgjedhje taktike?

Jam pro zgjedhjeve teknike e taktike, kjo është në rregull. Unë jam një djalë i ri, prandaj gjëja e rëndësishme do të kishte qenë të fitoja ndeshjen. Kjo nuk ndodhi, më vjen shumë keq.

Por le të përpiqemi ta shohim gotën gjysmë plot. Ju pushuat dhe për këtë arsye do të jetë plotësisht në formë për ndeshjen e ardhshme të Interit…

Sigurisht, unë kam qenë gjithmonë në dispozicion të trajnerit dhe kështu do të jetë edhe të shtunën (buzëqesh).

Roma fillimisht, pastaj javën e ardhshme ndeshja e Champions League kundër Barcelonës. Ndërkohë Brozovic është dëmtuar me Kroacinë. Pra, a shpresoni se më në fund po vjen shansi juaj?

Po, le të shohim. Është për të ardhur keq që humbëm Marcelo, një lojtar themelor për ne. Por nëse vjen radha ime, jam gati. Do të përpiqem të jap më të mirën.

Vitin e kaluar e filluat te Primavera, me Empolin. Më pas ekipi i parë dhe tani, pasi ishe protagonist në Serie A me toskanët, Interi. A ka një lloj emocioni brenda kokës suaj për mundësinë e konkurrimit në super gara të këtij lloji?

Duhet të mendoj nga ndeshja në ndeshje. Tani është një ndeshje shumë e vështirë kundër Romës, një skuadër e fortë. Le të shohim se çfarë do të dalë, por duhet të luajmë për tri pikët.

Si e interpretoni një fillim paksa të çalë të sezonit për Interin tuaj? A është skuadra gati të reagojë?

Po, patjetër. Ne gjithmonë punojmë mirë dhe shumë gjatë javës. Jam i sigurt se rezultatet do të vijnë.

Ju ishit ndër më të mirët në parasezonin e zikaltërve, por më pas nuk ju pamë vazhdimisht në fushë, përkundrazi. Pavarësisht kësaj, zero fjalë të gabuara dhe zero polemika. A mendoni se e keni vërtetuar tashmë se jeni lojtar i Interit gjithsesi?

Në parasezon u stërvita mirë dhe luajta disa ndeshje, duke dhënë më të mirën time kur dola në fushë, si gjithmonë. E përsëris atë që thashë më parë: kur të vijë koha ime, do të jem gati dhe i lumtur.

Interi ende synon fitoren e titullit. A besoni se trengjyrëshi është i mundshëm?

Sigurisht, duhet të besojmë, ne luajmë për këtë.

Sa i përket Champions League, tani ju presin dy ndeshje vendimtare me Barcelonën. Të paktën njëra do të duhet të fitohet. A beson dhoma e zhveshjes së zikaltërve në mundësinë e mposhtjes së blaugrana-ve dhe kalimit të turit?

Sigurisht, do të duhet të luajmë për të fituar kundër Barçës, por do të mendojmë për të kur të vijë java e Champions League dhe ajo ndeshje. Tani e rëndësishme është Roma. Ne kemi në mendje vetëm ndeshjen e së shtunës kundër verdhekuqve.