Një numër i madh rusësh nxituan të rezervonin bileta vetëm vajtje jashtë vendit, pak orë pasi presidenti rus Vladimir Putin njoftoi një mobilizim të pjesshëm të rezervistëve ushtarakë për luftën në Ukrainë.

Fluturimet u mbushën shpejt dhe çmimet e biletave u rritën pas kërkesës së lartë për t’u larguar nga vendi, nxitur nga frika se kufijtë e Rusisë mund të mbyllen së shpejti ose se Putini mund të shpallë më vonë një thirrje më të gjerë që të dërgojë shumë meshkuj rusë të moshës luftarake në vijën e parë të luftës.

Fluturimet u kryen nga Moska, në drejtim të Dubait, Beogradit dhe Stambollit, pasi vendet e BE dhe disa të tjera kanë vendosur embargo që nga shkurti 2022.

Çmimi për fluturimet nga Moska në Stamboll ose Dubai u rrit brenda pak minutash duke arritur deri në 9,200 euro për një biletë ekonomike me një drejtim.

Dekreti i Putinit parashikon që numri i personave të thirrur në detyrë aktive do të përcaktohet nga Ministria e Mbrojtjes, citon noa.al. Ministri i Mbrojtjes Sergei Shoigu tha në një intervistë televizive se fillimisht do të mobilizohen 300,000 rezervistë me përvojë luftarake dhe shërbimi ushtarak.

Rusia ka parë një eksod të theksuar të qytetarëve që kur Putin urdhëroi trupat e tij të pushtonin Ukrainën pothuajse shtatë muaj më parë.

Gjatë fjalimit drejtuar kombit të mërkurën, Puti. njoftoi mobilizimin e pjesshëm të rezervistëve. Ai lëshoi ​​gjithashtu një kërcënim sulmi bërthamor për armiqtë e Rusisë në Perëndim, duke theksuar se ky nuk është një bllof.

Zyrtarët rusë u përpoqën të qetësonin publikun, duke thënë se thirrja për rezervistë do të prekte një numër të kufizuar njerëzish që plotësojnë kritere të caktuara. Megjithatë, deklaratat kontradiktore dhe mungesa e detajeve ndihmuan në nxitjen e panikut. Po ashtu, rol luan frika se ky është vetëm hapi i parë i një plani të Putinit për të shtuar masivisht forcat luftarake ruse në Ukrainë.

Kreu i komitetit të mbrojtjes të Dumës, Andrei Kartapolov, tha se qytetarët që kualifikohen si rezervistë të ndalin udhëtimet jashtë vendit, duke theksuar se ata duhet t’i thonë jo ikjes në resortet e Turqisë.

"Kaloni pushimet tuaja në vendpushimet e Krimesë ose në rajonin jugor të Rusisë Krasnodar," tha Kartapolov.

Biletat për në Beograd, Stamboll, Antalia, Dubai, si dhe Gjeorgji e Armeni, janë shitur të gjitha të paktën deri në mes të tetorit.

Kryeqyteti i Serbisë, Beogradi është bërë një destinacion popullor për rusët gjatë luftës. Të paktën 50,000 rusë kanë ikur në Serbi që kur Rusia pushtoi Ukrainën në shkurt dhe shumë prej tyre kanë hapur biznese, veçanërisht në sektorin e IT.

Rusët nuk kanë nevojë për viza për të hyrë as në Emiratet e Bashkuara Arabe dhe as në Turqi dhe në Serbi. Aleatët si Bjellorusia dhe Kina gjithashtu nuk kanë vendosur sanksione ndaj Rusisë.

Një fluturim i së mërkurës nga Moska në Beograd ishte i mbushur me të rinj rusë të cilët thanë se nuk mund të flisnin me gazetarët sepse kishin frikë nga pasoja negative për familjet që lanë pas. Një grua ruse, e cila e identifikoi veten si Yulia, tha se edhe ajo kishte frikë se “qeveria dhe policia” mund t’i shihnin vërejtjet e saj.

“Por unë dua të them, ‘Liri për Ukrainën’. Ju lutem, dikush ta ndalë Putinin”, tha ajo. /noa.al