Presidenti Joe Biden e ka shpallur pandeminë në SHBA të përfunduar, ndonëse numri i amerikanëve që kanë ndërruar jetë nga Covid vazhdon të rritet. "Pandemia ka mbaruar. Ne jemi ende duke bërë shumë punë për të. Por pandemia ka mbaruar", tha ai në transmetim televiziv, citon noa.al.

Biden tha po ashtu se SHBA po bëjnë "shumë punë" për të kontrolluar virusin. “Nëse vini re, askush nuk mban maska. Të gjithë duket se janë në formë mjaft të mirë… Mendoj se po ndryshon”, tha ai.

Deklarata befasoi vetë zyrtarët e lartë shëndetësorë të presidentit, shumë prej të cilëve mësuan për konstatimet e Biden vetëm nga tweetet dhe titujt e lajmeve. Presidenti nuk kishte planifikuar fillimisht të shpallte lajme të mëdha për Covid, as nuk kishte diskutuar me këshilltarët e tij shëndetësorë për të shpallur fundin e pandemisë, thanë dy zyrtarë të lartë në Shtëpinë e Bardhë që citon Politico USA.

Të dhënat nga Universiteti Johns Hopkins tregojnë se mesatarja shtatë-ditore e vdekjeve aktualisht është mbi 400. Në janar 2021, për krahasim, më shumë se 23,000 njerëz u raportuan të vdekur nga virusi gjatë një periudhe të vetme javore. Rreth 65% e popullsisë totale të SHBA-së konsiderohet plotësisht e vaksinuar.

Zyrtarët e shëndetit publik kanë shprehur optimizëm javët e fundit duke thënë se bota po shkon drejt një rikuperimi pandemik.

Por në të kundërt, Anthony Fauci, kreu i Institutit Kombëtar të Alergjisë dhe Sëmundjeve Infektive, paralajmëroi dje se variante të reja Covid-19 mund të shfaqen ende, veçanërisht në muajt e ardhshëm të dimrit.

"Nuk ka gjasa që SHBA të zhdukë koronavirusin dhe një variant i ri "i dyshimtë", BA 2.75.2, është në horizont, tha të hënën këshilltari kryesor mjekësor i Presidentit Joe Biden, Anthony Fauci, gjatë një bisede në Qendrën për Studime Strategjike dhe Ndërkombëtare duke theksuar se sipas tij, varianti i ri pritet midis fundit të vjeshtës dhe fillimit të dimrit.

"Ne nuk jemi aty ku duhet të jemi nëse do të jemi në gjendje të ‘jetojmë me virusin’", tha Dr Fauci dhe shtoi:

"Ne ende duhet të jemi të vetëdijshëm se sa i pazakontë është dhe vazhdon të jetë ky virus në aftësinë e tij për të evoluar në variante të reja që sfidojnë mekanizmat standardë të shëndetit publik për trajtimin e një shpërthimi.”

Më tej ai tha: "Pyetja tjetër që bëjmë: ‘A do të jemi në gjendje ta eliminojmë kovidin nga SHBA nga pjesa më e madhe e botës?’ dhe përgjigja është se nuk ka gjasa, sepse është shumë e transmetueshme dhe imuniteti që mundësohet nga vaksina ose infektimi është gjithashtu kalimtar.” /noa.al

Foto: NYT