Dembele shënoi dy gola në fitoren e plotë 5-1 të skuadrës së tij ndaj Viktoria Plzen, në ndeshjen hapëse të fazës së grupeve të Champions League. Trajneri Xavi e lavdëroi atë pas një shfaqjeje tjetër të shkëlqyer dhe e krahasoi me yllin e Paris Saint-Germain, Neymar, i cili luajti në “Camp Nou” midis viteve 2013 dhe 2017:

"Dembele është i lumtur, jep asiste, bën diferencën. Ai është i pandalshëm në krah dhe mjaft vendimtar. Kam parë pak lojtarë me atë aftësi në duelet një kundër një".

Trajneri i Barçës shtoi më tej për francezin: "Ai është në nivelin e Neymarit më të mirë. Kishte vuajtur shumë vitet e fundit dhe e meriton atë që është tani. Nuk ka asnjë anësor të pastër që mund të dalë në të dyja anët si ai".

Dembele ka kaluar në të gjithë “filtrat” në fillim të sezonit 2022-2023, pasi nënshkroi një kontratë të re me Barçën në verë. Francezi ka një gol dhe katër asiste në emrin e tij nga pesë paraqitje në të gjitha garat.

Tashmë duket se i ka lënë pas vetes vështirësitë e dëmtimeve, që më parë ia prishën karrierën në “Camp Nou”. Meritë për këtë ka padiskutim trajneri Xavi, që ngulmoi për qëndrimin e tij dhe i ka dhënë besim të pakushtëzuar.

Pas një fillimi mbresëlënës në Ligën e Kampionëve, Barcelona do ta kthejë vëmendjen te La Liga, pasi do të përballet me Cadiz, jashtë shtëpisë, të shtunën.