Një varg shpërthimesh dhe zjarresh e ka kthyer Krimenë e pushtuar nga Rusia nga një bazë e sigurt për rusët, në një fushë beteje të re në luftë, duke demonstruar si cenueshmërinë e rusëve, por dhe aftësinë e ukrainasve për të goditur thellë pas linjave të armikut.

Nëntë avionë luftarakë rusë u shkatërruan në një bazë ajrore në Krime dhe një depo municioni në gadishull shpërtheu të martën.

Autoritetet ukrainase nuk kanë marrë publikisht përgjegjësinë, duke preferuar ta mbajnë botën me hamendje. Por Presidenti Volodymyr Zelenskyy aludoi për sulmet ukrainase prapa linjave të armikut pas shpërthimeve të fundit, për të cilat Rusia i fajësoi për "sabotim".

Rusia pushtoi gadishullin e Krimesë nga Ukraina në vitin 2014 dhe e ka përdorur atë si një terren për sulmet ndaj Ukrainës në luftën që filloi më 24 shkurt. Autoritetet ukrainase janë zotuar të rimarrin Krimenë dhe territoret e tjera të pushtuara.

"Pushtuesit do të vdesin si vesa në diell," tha Zelenskyy, në fjalimin e tij të natës të mërkurën, për përpjekjet për të rimarrë Krimenë dhe zona të tjera.

Shpërthimet përfaqësojnë pengesën më të re për Moskën, e cila filloi pushtimin e saj me shpresën për të marrë Kievin në një ofensivë rrufe, por shpejt u zhyt përballë rezistencës së ashpër.

Ndërsa lufta i afrohet gjashtëmujorit, të dy palët janë përfshirë në një luftë rrënuese shkatërrimi, duke luftuar fshat më fshat, kryesisht në lindje të vendit.

Sulmet në Krime mund të shënojnë hapjen e një fronti të ri që do të përfaqësonte një përshkallëzim të rëndësishëm në luftë dhe mund të rrënojë më tej burimet e Rusisë.

"Komandantët rusë ka shumë të ngjarë të shqetësohen gjithnjë e më shumë me përkeqësimin e dukshëm të sigurisë në të gjithë Krimenë, e cila funksionon si zonë bazë e pasme për pushtimin," shkroi Ministria e Mbrojtjes e Britanisë në Twitter, citon noa.al.

Për shkak të sulmeve në aeroport, Rusia po lëviz dhjetëra avionë luftarakë dhe helikopterë në pozicione më të thella në Krime dhe në bazat ruse gjetkë, njoftoi inteligjenca ushtarake ukrainase.

Shpërthimet e së martës ndodhën në një bazë municioni pranë qytetit të Dzhankoi, duke detyruar evakuimin e rreth 3,000 njerëzve. Municionet vazhduan të shpërthejnë të mërkurën dhe autoritetet luftuan zjarret me një helikopter, tha udhëheqësi rajonal i Krimesë, Sergei Aksyonov. Ai tha se po punohet për kapjen e autorëve.

Gazeta Kommersant raportoi gjithashtu shpërthime të martën në një bazë të Krimesë në Gvardeyskoye. Nuk kishte asnjë konfirmim nga rusët.

Raporti i inteligjencës britanike tha se Gvardeyskoye dhe Dzhankoi janë bazat e dy prej aeroporteve më të rëndësishme ushtarake ruse në Krime.

Pak më shumë se një javë më parë, shpërthime tronditën bazën ajrore ruse Saki në Krime dhe shkatërruan avionë në tokë. Moska sugjeroi se shpërthimet ishin aksidentale, të shkaktuara ndoshta nga një duhanpirës i pakujdesshëm, por autoritetet ukrainase u tallën me atë shpjegim dhe lanë të kuptohet përfshirjen e tyre.

Muajin e kaluar, një pajisje e vogël shpërthyese e transportuar nga një dron i improvizuar shpërtheu në një oborr të selisë së flotës ruse të Detit të Zi në portin e Krimesë të Sevastopolit, duke plagosur gjashtë persona dhe duke shkaktuar anulimin e ceremonive atje për nder të marinës ruse. /noa.al

Fotot: AP