Pjesë e Kuvendit Kombëtar të Partisë Demokratike është bërë edhe analisti i njohur Artan Hoxha, i cili ka mbajtur një fjalim të fortë: Gëzuar dhe e gëzofshim PD-në e rithemeluar. Është një ngjarje e madhe pas një përpjekje për të zgjidhur një konflikt absurd, ku një pakicë uzurpoi për pak kohë të drejtat e shumicës. 

Sot jemi këtu për të hapur një kapitull të ri për PD-në. Unë shpresoj dhe besoj te ju se në Kuvendin e sotëm, ju do projektoni trajektoren e 30 viteve të ardhshme. Nëse do e bëni këtë, ky do të jetë një Kuvend historik.

Disa muaj më parë, më 11 dhjetor, ishte një tjetër Kuvend historik, pasi ju u vetëmblodhet si anëtarësi. Ju u vetëmblodhët dhe morët një vendim, mbajtët një qëndrim. Qëndrime të cilat do të mbeten në historinë e kësaj partie.

Ju patët kurajën dhe vetëbesimin t’i thonit edhe Amerikës, linjës zyrtare që qeveris sot atje: gabon kur mbështet pa kriter dhe pa kut këtë qeveri; gabon kur godet pa kriter dhe pa kut këtë opozitë. Ky qëndrim më thotë që ju keni dinjitet, integritet dhe sovranitet.

Vetëm kështu mund të jesh një partner, përndryshe pa këto cilësi je vetëm një shërbëtor i mjerë, një vasal i përmjerë”.