Barazimi i së dielës së kaluar në Torino nuk ia hoqi kryesimin e Milanit në renditje, i cili falë disfatës së brendshme të Napolit me Fiorentinën mbajti vendin e parë në kampionat, ndonëse i ndjekur nga afër prej bluve të Spallettit dhe Interi.

Për kuqezinjtë, kundërshtari i radhës është Genoa. Një ndeshje, ajo e planifikuar për të premten në mbrëmje në “San Siro”, në prag të së cilës Stefano Pioli foli në një konferencë për shtyp:

"Besoj se tifozët janë arma jonë shtesë, ata na japin mbështetje të vazhdueshme. Duhet të përfitojmë nga kjo për të bërë mirë që tani deri në fund, për të arritur objektivin tonë. Djemtë luajnë për të fituar, kur dështojmë ka zhgënjim, por e transformojmë në vendosmëri, sepse e dimë se ka pak për të bërë më mirë.

Kam parë shumë motivim, kemi punuar mirë dhe me besim. E dimë që kemi për të bërë një përpjekje shtesë. Ne besojmë te titulli, sepse po luajmë futboll energjik dhe gjithmonë përpiqemi të dominojmë në fushë. Është e drejtë të besojmë, sepse jemi të fortë, kemi qenë përpara të gjithëve për një kohë të gjatë. Të gjithë së bashku jemi më të fortë, mund t’i luajmë shanset tona deri në fund.

Lojtarët në dispozicion? Ibrahimovic do të jetë ende i padisponueshëm, shpresojmë ta kemi për fundin e sezonit. Kemi rikuperuar Bennacer dhe Rebic, të cilët mund të luajnë nga minuta e parë, ose të marrin përsipër. Do të shohim nesër. Leao ka cilësi të shkëlqyera, finalizimi është i mirë për të.

Titulli, realitet apo ëndërr? Kjo varet nga ne, sepse varet nëse do t’i fitojmë ndeshjet apo jo. Llogaritjet bëhen në fund; ne kemi cilësitë për të fituar shumë pikë. Sezoni i Milanit është ende i pjesshëm, nuk është momenti për të bërë një bilanc. Duhet të jemi të përqendruar deri në fund.

E ardhmja e Ibrahimovic? Nuk ka asgjë që shkoi keq me të. Ka probleme fizike, që vijnë me moshën. Shpresojmë ta rikthejmë në ndeshjet e fundit. Mbi të ardhmen e tij nuk mendoj se ka ndryshuar asgjë. Ibra ka inteligjencën dhe guximin për të bërë zgjedhjen më të mirë; ne do të jemi me të çfarëdo zgjedhjeje që të bëjë.

Ndeshja e nesërme? Për Genoa kemi ‘plan A’, por edhe një ‘plan B’. Jemi gati për situatat e paparashikueshme. Saelemaekers mbrojtës? Është një zgjidhje, më shumë gjatë lojës sesa në fillim. Mungesat e Kjaer, Ibra dhe Florenzi janë të rëndësishme, sepse ata kanë personalitet, por unë besoj shumë në mentalitetin e lojtarëve të mi.

Mendoj se asnjë nga rivalët e tjerë nuk ka më shumë dëshirë për të fituar se tjetri, nuk i shikoj kundërshtarët me kaq vëmendje, duhet të qëndrojmë të fokusuar te vetja.

Brahim Diaz? Ai kishte një rënie të gjendjes, siç është normale në një sezon si i yni, por luajti edhe ndeshje të tjera shumë të mira. Ka mjaft cilësi dhe nga këtu deri në fund do të jetë shumë i rëndësishëm".