Të paktën 1,892 civilë janë vrarë dhe 2,558 janë plagosur që nga fillimi i luftës në Ukrainë në shkurt, sipas Organizatës së Kombeve të Bashkuara.

Numri i vdekjeve të regjistruara përfshin 478 burra, 308 gra, 30 vajza dhe 52 djem, si dhe 71 fëmijë dhe 953 të rritur, gjeneralitetet e cilëve ende nuk dihen, tha në një deklaratë Zyra e Komisionerit të Lartë të OKB-së për të Drejtat e Njeriut (OHCHR).

“Shumica e viktimave civile të regjistruara u shkaktuan nga përdorimi i armëve shpërthyese me një zonë të gjerë ndikimi, duke përfshirë granatimet nga artileria e rëndë dhe sistemet e raketave të shumta lëshuese, si dhe sulmet me raketa ajrore,” thuhet në deklaratë.

Shifrat aktuale të viktimave mund të jenë më të larta për shkak të një vonese në raportimet nga disa zona, shtoi OHCHR. Këto përfshijnë zona të tilla si qyteti i rrethuar juglindor i Mariupolit, ku të dhënat janë ende në përpunim.

Zyra e Prokurorit të Përgjithshëm të Ukrainës ka raportuar një numër më të madh të viktimave në radhët e fëmijëve. Në një deklaratë të mërkurën, ajo tha se 191 fëmijë ishin vrarë dhe më shumë se 349 u plagosën që nga fillimi i pushtimit rus.