Përditësuar

Gjykata e Posaçme Kundër Korrupsionit dhe Krimit të Organizuar njoftoi sot se ka pranuar kërkesën e Prokurorisë së Posaçme për arrestimin dhe mbajtjen në burg pa afat të deputetit socialist Alqi Bllako.

Pas vendimit të gjykatës, Policia e Shtetit ka marrë njoftim për të ekzekutuar urdhër-arrestin për Alqi Bllakon.

Nuk ka njoftime për prangosjen e Bllakos deri pasdite vonë.

Ishte SPAK që ngriti akuza ndaj Bllakos për korrupsion dhe shpërdorim detyre lidhur me aferën e inceneratorëve.

Nga hetimet, SPAK akuzon Bllakon se ka përfituar 15 milionë lekë, pasi kur ishte sekretar i Përgjithshëm në Ministrinë e Mjedisit ka falsifikuar disa dokumente për një tokë, ku do të ndërtohej inceneratori i Fierit.

Sipas Prokurorisë, shkelja është bërë në bashkëpunim me Ministrin e Mjedisit, Lefter Koka, i cili tashmë ndodhet në burg për të njëjtën çështje.

SPAK ekzekutoi 9 urdhër-arrestet e lëshuara për hetimin që lidhet me inceneratorin e Fierit, ndërsa janë lëshuar edhe 5 urdhër-arreste të reja për inceneratorin e Elbasanit.