Futbolli, loja më popullore në botë, është një biznes që gjeneron miliarda.

Për herë të parë në historinë e tij, Manchester City është klubi më i pasur në botë. Kjo është ajo që del nga Football Money League 2022, studimi vjetor mbi pasqyrat financiare të klubeve të futbollit që publikohet çdo vit nga Deloitte.

Në sezonin 2020/21, ‘qytetarët’ kishin një rritje të të ardhurave prej 17%, deri në 644.9 milionë, 4.2 milionë më shumë se Real Madrid i vendit të dytë. Podiumi mbyllet nga Bayern Munich. Juve, i nënti, është i pari mes italianëve (433.5 milionë). Interi renditet në vendin e 14 (330.9 milionë).

Sipas raportit, 20 klubet më të mirë në futbollin botëror kanë grumbulluar 8,178 miliardë euro në sezonin 2020-2021, pak më shumë krahasuar me 2019-2020 (8,162 miliardë euro). Këtë vit, si dhe vitin e kaluar, llogaritë janë ndikuar edhe nga pandemia e Covid-19, me kufizimet që erdhën nga ajo.