Shumë ushtarë rusë u vranë gjatë luftës 22-ditore në Ukrainë, por numri i viktimave ndryshon në varësi të burimit.

Çdo ditë, ushtria ukrainase njofton humbjen e trupave, njerëzve dhe pajisjeve ruse. Sipas informacioneve të sotme të transmetuara nga mediat ukrainase, 14 mijë ushtarë rusë kanë humbur jetën gjatë luftimeve.

Çfarë vlerëson Shërbimi Sekret Amerikan

Sipas inteligjencës amerikane, numri i ushtarëve rusë të vdekur është ndjeshëm më i ulët. Shtetet e Bashkuara vlerësojnë se pak më shumë se 7000 ushtarë rusë janë vrarë që nga fillimi i luftës tri javë më parë.

Sipas zyrtarëve të Pentagonit që folën për New York Times, ata ishin në gjendje të konfirmonin këto humbje duke analizuar fotot dhe videot satelitore.

Rusia vetë, ka nxjerrë vetëm një informacion zyrtar shumë ditë më parë, duke thënë se ka humbur 500 ushtarë. Asnjë përditësim tjetër nuk është bërë, raporton noa.al.

Amerikanët vlerësojnë se më shumë se 150,000 trupa ruse kanë pushtuar Ukrainën.

Të plagosurit, sipas të njëjtave burime, arrijnë nga 14 deri në 21 mijë.

Nga ana tjetër, në fillim të kësaj jave, Volodymyr Zelensky pranoi se rreth 1300 ushtarë ukrainas ishin vrarë që nga 24 shkurti, dita e parë e luftës.