Meta, kompania amë e Facebook-ut, ka thënë se nuk dëshiron të tërheqë shërbimet nga Evropa, por shton se do të detyrohet të ndërmarrë vendime të tilla.

Kjo mundësi është diskutuar pas mospajtimeve për transferimin e të dhënave evropiane në Shtetet e Bashkuara.

Të dhënat janë kyçe për reklamim të bizneseve, të cilat gjenerojnë miliarda dollarë për kompaninë Meta.

“Ne absolutisht nuk kemi dëshirë dhe as plane për t’u tërhequr nga Evropa, mirëpo realiteti i thjeshtë është sepse Meta, dhe disa biznese tjera, organizata dhe shërbime, varen nga transferimi i të dhënave në mes të Bashkimit Evropian dhe Shteteve të Bashkuara, në mënyrë që të funksionojnë shërbimet globale”, ka thënë kompania përmes një deklarate.

Marrëveshja për të dhënat në internet, “Mburoja e Privatësisë” mes Evropës dhe SHBA-së, është shfuqizuar në korrik të vitit 2020 me një vendim të gjyqësorit të BE-së, që ka përballur kompanitë e mëdha teknologjike me pasiguri të madhe.

Meta ka thënë se "nëse nuk miratohet një kornizë transatlantike për transferim të të dhënave, ne nuk do të mund të ofrojmë një numër të madh të produkteve dhe shërbimeve tona, përfshirë Facebook dhe Instagram në Evropë”.

Platorma Facebook është përballur së fundi me rënien më të madhe të vlerës në treg, si pasojë e zvogëlimit të numrit të përdoruesve ditorë.