Thonë se paratë nuk sjellin lumturi, por ndihmojnë. Epo, Ancelotti mban në stol te Real Madridi 340 milionë euro, ose tre sulmues që do të përbënin një treshe të frikshme në çdo ekip të madh. Askush nuk e ka vënë në dyshim trajnerin italian kur ka hequr dorë nga Hazard, Jovic dhe Bale; me Benzema dhe Vinicius duke u argëtuar, duke thyer mbrojtjet e rivalëve.

Ancelotti arriti në "finalen" e Bilbaos (ku u eliminua nga Kupa e Mbretit) pa Benzema dhe me një Vinicius të dëshpëruar e lodhur, pasi luajti dy ndeshje me ekipin e tij në më pak se gjashtë ditë. Kësaj iu shtuan më shumë se 23.500 kilometra udhëtim në itinerarin Madrid-Quito-Belo Horizonte-Madrid-Bilbao, për shkak të angazhimeve kualifikuese me Selecao.

Nuk kishte kohë më të mirë për të luajtur me Hazard, Jovic dhe Bale në një turne, në të cilin trajnerët iu japin mundësi zëvendësuesve për t’iu bashkuar kauzës në një sezon kërkues si ky i të bardhëve. Ancelotti vendosi për të mos i përdorur ata, kur i duheshin më shumë.

Ai preferoi të luante në "San Mamés" pa një qendërsulmues dhe të përsëriste “ekuacionin” e tij me Asensio e Rodrygo, të cilët ende nuk janë të barabartë me titullarët me gjithë përpjekjet e tyre për të luajtur gjithmonë.

Italiani është përpjekur të tregojë se paratë nuk sjellin lumturi dhe ka lënë në stol 277 milionët (bëhen 340 milionë bashkë me pagat e marra) që Florentino Pérez shpenzoi. "Carletto" i beson një grupi lojtarësh dhe i ka “përjashtuar” të tjerët, edhe pse thotë se ka nevojë për të gjithë.

Ai nuk rresht së kërkuari falje për ata që nuk luajnë, siç ka bërë me Isco, Ceballos, Hazard, Jovic, Vallejo, Marcelo, Mariano, Lunin apo Camavinga. Nga ana e tij, Bale nuk ka pasur ende mundësi për shkak të dëmtimeve të vazhdueshme.

Gjëja e qartë është se Hazard, Jovic dhe Bale janë "përjashtuar" nga Ancelotti dhe klubi i ka nxjerrë në treg, por nëse nuk luajnë, vështirë t’i shesin, sepse nuk marrin oferta.