Familjarët e Ziver Veizit, një prej personave të vrarë në 21 Janar 2011, kanë kryer homazhe pranë varrit të tij në Gjirokastër.

Motra e Ziverit, Trëndafilja, mëngjesin e sotëm ishte te varri i vëllait duke e kujtuar mes lotësh dhe vajtimit.

“O zemra e motrës tënde, o vëlla na ka marrë malli. I miri i motrës, që të donte shumë”, shprehet ajo.

Trëndafilja, thotë se edhe sot, 11 vite më pas drejtësia nuk është vënë në vend dhe nuk është bërë asgjë për zbardhjen e ngjarjes.

Megjithatë, shpresë ka se një ditë do të vendoset drejtësia në vend. “Ne drejtësinë do ta kërkojmë derisa të rrojmë. Nuk dua të ma zësh fare në gojë Berishën. Unë dua drejtësinë për vëllanë tim, do ta kërkoj dhe do ta gjej” tha ajo për mediat.

Homazhet për Ziver Veizin kanë bërë bashkë familjarë, miq dhe drejtues të pushtetit vendor. Edhe në Tiranë, kryeministri Edi Rama i shoqëruar nga familjarët e viktimave vendosi lule dhe bëri homazhe në bulevard në vendin ku u vranë protestuesit.

11 vite më parë u ekzekutuan në bulevard Aleks Nika, Ziver Veizi, Faik Myrtaj dhe Hekuran Deda, pas protestës së thirrur nga Edi Rama, asokohe në krye të opozitës.