Fotoreporteri i njohur Felix Bilani, i cili prej shumë vitesh ka fiksuar në celuloid momente të rëndësishme të zhvillimeve në vend, ishte dhe sot në protestën e kampit opozitar për të pasqyruar evoluimin e saj në mediat prestigjioze ndërkombëtare.

Ndërsa ishte në krye të detyrës për t’i sjellë publikut fotot profesionale që shihni më poshtë, Bilani u përball me gaz që u hodh fillimisht nga selia e PD dhe më tek nga policia.

Për shkak të toksikimit nga gazi, Bilani përfundoi në ndihmë urgjente mjekësore pasi një autoambulancë ofroi shërbim për të detoksikuar fotoreporterin.

Duke folur me noa.al, Bilani pohon se është shtangur nga gazi që iu hodh njerëzve, përfshirë mediave. Ai thotë se gazi që u hodh nga selia e PD nuk ishte gaz i thjeshtë lotsjellës.

Ndërsa shton se bombolat me gaz që doli se ishin përdorur, ishin me lëndë të paqartë duke theksuar se "ka diçka që nuk shkon".

Felix Bilani sot duke u mjekuar pasi në krye të detyrës u helmua me gaz në selinë e PD

Teksa merrte ndihmë mjekësore nga Urgjenca, Bilani lëshoi publikisht një mesazh për deputetin Lulzim Basha:

"Kjo është pamja ime pas përdorimit të gazit. Është përdorur gaz i ndaluar për përdorim. Lulzim Basha, bashkë e kemi privatisht", paralajmëron Bilani në videomesazhin që e gjeni këtu. /noa.al