Kërcënohet Kryeministri i Kosovës, Albin Kurti. Forca të shumta policore janë vendosur menjëherë pranë shtëpisë së tij, si një masë sigurie për kreun e qeverisë së Kosovës.

Lajmi është konfirmuar për mediat kosovare nga zëdhënësi i Qeverisë së Kosovës, Përparim Kryeziu.

Nuk dihet se për çfarë kërcënimi bëhet fjalë, e as kush e ka kërcënuar kryeministrin, ndërkohë autoritetet po merren me hetimet në lidhje me ngjarjen.

“Kryeministri Kurti është kërcënuar. Për këtë arsye, si masë e kujdesit të shtuar, është rritur edhe niveli i tij i sigurisë. Institucionet e hetuesisë dhe sigurisë tashmë janë duke bërë punën e tyre. Ato bëjnë vlerësimet e nevojshme dhe ndërmarrin masat përkatëse. Në anën tjetër, kryeministri vazhdon angazhimin e tij të rregullt”.- ka bërë me dije Kryeziu.