Las Vegas, Nevada. Një ankand rekord, ai që lejoi koleksionistin Nick Fiorella të bënte të vetën reliken e çmuar. Këto janë atletet e para sportive “Nike”, të mbathura nga Michael Jordan në sezonin e rregullt të NBA, të shitura në ankandin e “Sotheby’s” për 1.472 milionë dollarë.

Nuk kishte ndodhur kurrë më parë që një palë atlete të shiteshin për kaq shumë para. Siç raportohet nga “Bloomberg”, ato u mbathën në ndeshjen e pestë të Jordan në NBA, në sezonin startues të tij, më 1984.

Bëhet fjalë për të njëjtin vit, kur “Nike” dhe Jordan krijuan bashkë linjën e atleteve dhe rrobave sportive. Kujtojmë se ky nuk ishte ankandi i parë i gjërave të legjendës së basketbollit amerikan.

Vitin e kaluar, një palë atlete të tjera të tij u shitën për shumën rekord prej 560.000 dollarësh, gati katër herë sa vlerësimi fillestar.

Atletet e autografuara nga “Air Jordan 1s”, të krijuar për Michael Jordan, pritej të shiteshin midis 100.000 deri në 150.000 dollarë në ankandin përkatës, por u blenë shumë më tepër se kaq.