Kremlini ka reaguar ndaj vendimit të Kosovës për shpalljen si persona "non-grata" të diplomatëve të saj.

Ministria e Punëve të Jashtme të Rusisë shprehet se ky akt është një provokim i madh anti-rus, që dy diplomatë rusë u shpallën persona non-grata në Kosovë.

Dy diplomatë rusë të Zyrës Ndërlidhëse të Rusisë në Kosovë, janë shpallur të padëshirueshëm në territorin e Kosovës, për shkak të aktivitetit të tyre të dëmshëm, që ka cenuar sigurinë kombëtare dhe rendin kushtetues të Kosovës.

Ministria e Jashtme e Rusisë në faqen e saj zyrtare ka reaguar ndaj këtij vendimi.

“Më 22 tetor, të ashtuquajturat ‘autoritete’ të Kosovës kanë filluar një provokim të madh anti-rus, duke njoftuar – përfshirë publikisht – se dy diplomatë rusë që punonin në Zyrën në Prishtinë të Ambasadës sonë në Republikën e Serbisë, janë të padëshiruar. Supozojmë se ky sulm nga administrata në Prishtinë, nuk sjellë ndonjë pasojë për statusin ligjor të stafit diplomatik rus të përmendur. Në përputhje me të drejtën ndërkombëtare dhe Rezolutën 1244 të Këshillit të Sigurimit të OKB-së, që është thelbësore për zgjidhjen e Kosovës, ata janë akredituar pranë Misionit të Administratës së Përkohshme të OKB-së në Kosovë (UNMIK) dhe nuk kanë lidhje me strukturat e këtij shteti të vetëshpallur”, ka thënë zëdhënësja e Ministrisë së Jashtme të Rusisë, Maria Zakharaova.

Zyrtarja e lartë ruse ka thënë se ky është me gjasë një projekt perëndimor, ku po ndiqet një politikë agresive kundër Rusisë. Ndërsa ka kërkuar garanci nga UNMIK-u e forcat ndërkombëtare për personelin e saj në Prishtinë.

“I bëjmë thirrje UNMIK-ut dhe Forcës Ndërkombëtare për Kosovën, në kuadër të kompetencave sipas Rezolutës 1244, të sigurojnë siguri të besueshme dhe kushtet e nevojshme për punën e plotë të personelit në Zyrën Ruse në Prishtinë. Ne presim garancitë përkatëse me shkrim nga administrata e OKB-së. Shpresojmë që sjellja sfiduese e liderëve kosovarë të marrë kualifikimet e duhura kritike”