Transmetuar më 20-09-2021, 21:36

Vazhdojnë të mbeten të tensionuara raportet mes Prishtinës dhe Beogradit. Gjithçka ka nisur sot me hyrjen në fuqi të vendimit të njohjes së reciprocitetit të targave.

Serbët bllokuan në mëngjes pikën kufitare, më pas Vuçic mblodhi Shtabin e Sigurisë dhe ndërkohë nisën edhe protestat  serbe në Veri të Kosovës.

Deputeti i Lëvizjes Vetëvendosje, Armend Muja thotë se reciprociteti i targave nuk është gjë e papritshme.

Muja në RTV Dukagjini thotë se ndërkombëtaret janë njoftuar qysh para dy muajsh për skadimin e marrëveshjes për targat.

“Ka ardhur koha kur Kosova mendon se kjo marrëveshje nuk duhet të vazhdojë më”, tha ai.

Deputeti i LVV-së thotë se Kosova nuk është e interesuar që situata në veri të eskalojë.

“Ne garantojmë se qytetarët serb në veri do të kenë të garantuar të gjitha të drejtat, sidomos atë të lëvizjes”.

Ai thotë se plani është menduar për një kohë të gjatë dhe janë paraparë të gjitha skenarët.

“Janë menduar të gjitha skenarët e reagimit dhe do të ketë masa për secilin skenarë të mundshëm. Kjo qeveri nuk e ka në plan të kthehet mbrapa. Nuk do të pranojmë pozicion inferior dhe që bie ndesh me Kushtetutën e Kosovës”.

Deputeti i shumicës parlamentare thotë se vendimi për targat nuk lidhet aspekt me zgjedhjet lokale.